Kuvendi rrëzoi kërkesën e paraqitur nga grupi parlamentar i PD-së për të votuar sot ndryshimet në Komisionin e Reformës Zgjedhore.
Gazment Bardhi me cilësinë e Kryetarit të Grupit Parlamentar akuzoi socialistët se nuk e duan reformën zgjedhore, pasi nuk i interesojnë zgjedhjet e lira.
“Nëse ju do të ishit të interesuar nuk do të përfshinit Pëllumb Gjokën në zgjedhjet e Shkodrës, as do të përdornit bandit kriminale në çdo qytet të Shqipërisë. Por ju nuk jeni të interesuar për zgjedhje të lira, ju nuk doni reformën zgjedhore.
E dini ju që në përbërjen e Komisionit janë deputetë që kanë dorëzuar mandatet? Është e drejtë e opozitës të paraqesë emrat e përfaqësuesve të saj në komisionet parlamentare. Ju kemi bërë propozimet, votoni për ndryshimet, çfarë ka këtu që nuk mund ta bëni”, iu drejtua Bardhi, drejtueses së seancës Ermonela Felaj.
Më parë ishte Bledi Cuçi, kryetar i Grupit Parlamentar socialist që propozoi që në seancën e sotme mund të votohej përbërja e Komisionit të Reformës Zgjedhore, por të përfshihej në seancë edhe votimi i ligjit për rritjen e pagave të anëtarëve të Gjykatës Kushtetuese.
Ky propozim i Çucit u konsiderua si pazar nga ana e deputetëve të opozitës. Në fund ishte seanca e cila hodhi në votim kërkesën e Bardhit duke e rrëzuar atë.
Discussion about this post