Thirrjeve për t’u bashkuar në protestën për rritjen e çmimeve ditën e hënë në orën 17:00 para Kryeministrisë, i është bashkuar dhe aktivisti e pedagogu i njohur, Ervin Goci.
Përmes një postimi në Facebook, Goci thotë se nuk duhet pasur iluzione që jetojmë në demokraci, ndërsa shton se njerëzit që ikin, nuk e kanë mllefin me Shqipërinë, por me pushtetin.
“Ky është pushtim, kjo është tirani, nënshtrim, dhunim, pengmarrje, quajeni si të doni, po mos të kemi iluzione që jetojmë në treg të lirë apo demokraci. Ka filluar shpesh e më shpesh, më duket vetja si peng në këtë shtet, e keni vënë re se me çfarë mllefi ikin njerëzit, dhe nuk e kanë mllefin me Shqipërinë, por me tiraninë“, shkruan ai.
Për Gocin, zgjidhje është një ligj për ndërmarrjet publike që të ketë pavarësi ekonomike, dhe shteti të ndërhyjë vetëm në raste emergjence. Gjithashtu, sipas tij duhet bërë një bilanc që tregon si përcaktohet çmimi dhe përse nuk lëviz sipas një burse.
“Një ligj për ndërmarrjet publike, që të kenë pavarësi ekonomike dhe vendimmarrje, dhe shteti të ndërhyjë vetëm në raste emergjence, jo si kjo emergjenca e sotme që na bën të shqyejmë sytë nga habia e indinjata. Duhet transparencë totale, këto kanë 3 vite që nuk deklarojnë bilance, ne nuk dimë se pse blejnë e pse shesin, dhe si i kanë hesapet, si përcaktohet çmimi, pse çmimi nuk lëviz sipas një burse, ku sigurisht mund të ketë tavan e dysheme, por vlera e përkthyer në para duhet të marrë frymë, se kështu siç është, është variant i tollonit”, tha ai.
Ndër të tjera, ai propozon të shqyrtohen kontratat me koncensionet dhe kufijtë e tregjeve.
“Duhen riparë kontratat me koncensionet, nuk munden ato që të shesin gjithë kohës jashtë Shqipërisë, pa plotësuar nevojat tona, dhe pa pasur aq energji sa mos të prodhohet skarcitet në treg duke e çuar çmimin firifiu.. Duhet urgjentisht të krijohen kufijtë e tregjeve, dmth një energji që prodhohet diku, të orientohet te nevojat lokale, ku merr kuptim dhe ekonomia lokale dhe e regjinalitetit, me këtë rast infrastruktura mund të bëhet me kapilare, më e efektshme dhe mund të prodhojë më pak humbje”, shprehet ai.
Goci bën thirrje të protestohet, pasi sipas tij pushteti e bëri të qartë që regjimi i koncensioneve, tenderave, i PPP-ve, nuk ndryshon, pavarësisht se sa nevojë kanë qytetarët.
