Agjencia Kombëtare e Shoqërisë së Informacioni është ende në ethe për faktin se hakerat iranianë vazhdojnë të kenë akses në shumë portale qeveritare. Megjithatë në deklarata e saj kryetarja e AKSHI-t, Majlinda Karçanaj, shprehet se po punohet për të ndalur këtë ndërhyrje. Nga aksion i Mirlindës shohim miliarda lekë që fluturojnë për sistemin, por asnjë siguri për të dhënat tona. Edhe këtë muaj, AKSHI ka luajtur me tenderë për sistemet e të dhënave. Bëhet me dije se afro 3.6 miliardë lekë po harxhon AKSHI për dy tenderë të mbyllur në një ditë.
Tenderi i parë mban numrin e referencës REF-44332-10-04- 2022 dhe ka objekt “Përmirësimin e Sistemit të Regjistrit Kombëtar të Adresave”, për Gjendjen Civile. Nuk llogaritet se sa euro janë hedhur deri më sot për regjistrin e adresave. Ky prokurim është mbyllur me datë 5 dhjetor 2022 dhe i është dhënë bashkimit të operatorëve “Image & Communications Development” dhe “ATOM shpk”. Oferta e tyre kap vlerën 164,000,000 lekë të reja. Pavarësisht çmimit të lartë të ofruar, AKSHI e shpalli fitues bashkimin e operatorëve. Ndërkohë një nga ofertat e tjera ishte shumë më ekonomike. Dy konkurrentë janë skualifikuar me argumentin se nuk kanë përkthyer si duhet emërtimin e certifikatave të dorëzuara.
Sakaq, vlen të përmendet se të dy pronarët e kompanive fituese janë emra të njohur në aferat me tenderë.
Pronari i firmës “Image & Communications Development” është Igli Gjelishti. Biznesmeni është përfshirë më herët në një skandal me AKSHI-n në vitin 2020, kur u akuzua publikisht se ka përfituar pa garë një tender 1 miliardë lekë nga AKSHI për shërbime IT. Ai akuzohej se këto para ia dha një pronari medie në mënyrë ilegale. Më vonë vetë Gjelishti pranoi marrjen e këtij tenderin dhe kalimin e parave tek një media, por përmes faturave tatimore. Ndërkohë ai vazhdon të marrë tendera nga AKSHI në çdo rast të mundshëm, sepse është i privilegjuar dhe i paracaktuar nga drejtoresha e miliardave, Mirlinda Karçanaj.
Edhe kompania ATOM shpk e drejtuar nga Luan Basha, është një nga subjektet që ka lidhur shumë kontrata me AKSHI-n. Përmendim këtu tenderin 4 miliardë lekë që mori “ATOM shpk” nga AKSHI, me objekt përmirësimin e rrjetit të IT në shkolla. Në fakt, realiteti tregon se shumë shkolla nuk kanë kabinet kompjuterik dhe jo më të marrin “shërbimet” e ATOM-it Edhe pse paraqiti ofertën sa 90% e fondit limit, edhe pse nuk gëzon një licencë për shërbim IT, ky subjekt u shpall fitues pa u zhvilluar asnjë garë. Gjithashtu më herët, Gjykata e Shkodrës i fali tenderin e dyshimtë për paisje elektronike. Në këtë rast ATOM shpk futi në xhep 10 milionë lekë pa u lodhur fare.
2 miliardë lekë harta e ushtrisë
Përveç regjistrimit të adresave, AKSHI do të bëjë “ndërhyrje” edhe në hartën e ushtrisë. Tenderi i dytë është hapur me qëllim “Ngritjen e sistemit të informacionit për gjeografinë dhe infrastrukturën ushtarake në shërbim të IGJIU”. Vetëm për informacion rreth kësaj harte, AKSHI ka vendosur të shpenzojë rreth 2 miliardë lekë. Për herë të parë AKSHI ka marrë në konsideratë ofertën më të lirë. Dhe i ka dhënë tenderin kompanisë C.C.S. sh.p.k me vlerë 189,931,000 lekë.
Por, të dhënat e gjetura hedhin dyshime, nëse ky tender është dhënë te Genci Likoskëndaj, pronari i C.C.S shpk. Ky ka fituar edhe shumë tendera të tjerë, madje në shkelje të ligjit. Një i tillë është tenderi me objekt “Suport dhe mirëmbajtje për SPI” me fond limit 4,830,000 lekë të reja pa TVSH.
Përmendim këtu edhe tenderin e dhënë nga Autoriteti Portual Durrë me objekt “Blerje pajisje në kuadër të zgjerimit të sistemeve ISPS”. Këtu Likoskëndaj ka marrë rreth 100 milionë lekë. Sakaq, vlen të përmendim se Likosëndaj është pronar i disa kompanive, si: C.C.S. OFFICE, TETRA SOLUTIONS (Ish CCS SOLUTIONS), C.C.S, CLICK dhe pronar i kompanisë “eOn”. Edhe këtë herë, AKSHI në vend që të zgjedhë me kujdes investimet që do të bëjë, kujdeset më shumë për kompanitë që duhet të fitojnë.
Lexo edhe: Goditja e fundvitit/ AKSHI blen 6.3 mld lekë kufje dhe mikrofona
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post