Nxënësit e klasave të para dhe atyre të dhjeta do të mund të regjistrohen këtë vit të ri shkollor vetëm nëpërmjet portalit e-Albania. Kjo ka nxjerrë në pah disa problematika, siç është interneti apo mosposedimi i një adrese në këtë portal.
Mësuesja Rizvana Nano, e cila është edhe pjesë e grupit të punës në gjimnazin Qemal Stafa, shprehet se shumë prindër i drejtohen shkollës kryesisht për çështje teknike. DISA prej tyre nuk kanë mundur të hapin as një adresë e-maili.
“Problematikat janë disa, duke filluar që nga mungesa e një adrese në e-Albania, janë të pa aksesuar. Nuk mund të kenë skaner në celular për të skanuar dokumentin që është dëftesa, s’kanë internet. Vijnë kërkojnë ndihmë. Janë bllokuar adresat e e-Albania, mundohemi t’i ndihmojmë”.
Drejtoresha e gjimnazit Qemal Stafa Klotilda Jaupaj tregon edhe disa raste specifike, kur regjistrimi i fëmijëve është i pamundur për tu kryer online.
“Ka edhe raste fëmijësh që nuk mund të regjistrohen dot përmes e-Albania. Janë rastet kur prindërit janë në emigracion dhe e kanë të pamundur aksesimin, ose kur janë në proces divorci dhe nuk ka kaluar kujdestaria.”
Shkolla të ndryshme të kryeqytetit përballen me kërkesa më të larta aplikimesh se disa të tjera. Gjimnazi “Qemal Stafa” është një prej tyre. Drejtoresha Jaupaj thotë se kjo është një sfidë më vete pasi ka prindër që për këtë arsye vonojnë procedurat e regjistrimit.
Të gjithë prindërit kanë afat deri ne 25 gusht për regjistrimin e fëmijëve ne klasat e para dhe te dhjeta. Apeli për ta është që të mos neglizhojnë dokumentet e kërkuara, dhe mos të aplikojnë në ditët e fundit.
Discussion about this post