Një 12-vjeçar shqiptar ka regjistruar rekord veprash penale të shkelura nga ai, të cilat janë konstatuar nga uniformat blu. Të paktën 67 herë ai është shoqëruar në komisariat, kryesisht për vjedhje. Mosha “favorizon” 12-vjeçarin, i cili vijon të konsumojë vepra penale, ndonëse ndalohet nga policia, kjo për shkak se ai nuk mund të arrestohet para moshën 14-vjeçare.
Të miturit në vend po përfshihen vazhdimisht në ngjarje të tilla, duke u kthyer në autor vjedhjesh të ndryshme. sipas vendimeve të gjyqtarëve në të gjithë Shqipërinë gjenden aktualisht nën shërbim prove 167 të mitur kryesisht për vjedhje dhe shpërndarje droge.
“Ka përgjegjësi penale personi që në kohën e kryerjes së një krimi ka mbushur moshën katërmbëdhjetë vjeç. Personi që kryen një kundërvajtje penale ka përgjegjësi kur ka mbushur moshën gjashtëmbëdhjetë vjeç.”, ky është ligji që parashikohet për të miturin bazuar në legjislacion.
Duke qenë se të miturit nuk mund të vuajnë dënim me burg për shkak të mbrojtjes së ligjore justifikuar nga mosha e tyre, dispozitat ligjore parashikojnë aplikimin e masave me karakter edukativ, ose siç njihet gjerësisht riedukim. Ndonëse ligji nuk mungon, në Shqipëri ende nuk ekziston një institucion i tillë, pavarësisht shifrave alarmante të të miturve të përfshirë në vepra që bien ndesh me ligjin. Këto të mitur nëse nuk trajtohen nga institucionet, me shumë gjasa përfundojnë në të rritur me rekorde kriminale. Gjykata këmbëngul se megjithë vendimet që shpallen ndaj të miturve midis moshës 14 deri në 18 vjeç, vërehet se ata po kthehen përsëritës.
Discussion about this post