Gjykata e Lartë ka rrëzuar rekursin e kryebashkiakut të Kuçovës Kreshnik Hajdari, duke lënë në fuqi që vendimi për mandatin e tij t’i takojë Komisionit Qendror të Zgjedhjeve (KQZ).
Çështja lidhet me procesin e zgjedhjeve të 14 majit, kur Kreshnik Hajdari, kandidat i mbështetur nga Partia Socialiste e Shqipërisë, dorëzoi formularin e vetëdeklarimit në KQZ, ku ka deklaruar se nuk ka qenë i dënuar ndonjëherë me vendim të formës së prerë në Shqipëri apo jashtë vendit.
Megjithatë, më pas autoritetet greke kanë dërguar përmes letër-porosisë një shkresë zyrtare, sipas së cilës Hajdari rezulton i dënuar nga Gjykata e Janinës për hyrje të paligjshme në territorin grek. Vendimi daton më 23 qershor 1999 dhe parashikon një masë riedukuese qortimi, në një kohë kur ai ka qenë 17 vjeç.
Sipas dokumenteve të drejtësisë greke, ai ka qenë i pranishëm në procesin gjyqësor dhe është trajtuar në atë kohë si punëtor.
Vendimi i Gjykatës së Lartë
Në arsyetimin e saj, Gjykata e Lartë thekson se për sa kohë KQZ nuk ka dalë me një vendim përfundimtar nëse rasti përfshihet apo jo në ligjin e dekriminalizimit, nuk ka objekt për shqyrtim gjyqësor në këtë fazë.
Më herët, KQZ kishte lejuar kandidimin e Kreshnik Hajdari, duke vlerësuar se ai nuk prekej nga ligji i dekriminalizimit. Megjithatë, Komisioni i Ankimimeve dhe Sanksioneve (KAS) ka kërkuar rishqyrtimin e çështjes dhe një vendimmarrje të re nga KQZ.
Kështu, fati i mandatit të kryebashkiakut të Kuçovës mbetet i hapur, në pritje të vendimit përfundimtar të KQZ-së.
gijotina.com/
Discussion about this post