Ylli brazilian Edson Arantes do Nascimento ‘Pele’ siguroi këtë të mërkurë se është “shumë mirë” dhe se ndihet “çdo ditë më mirë”, pasi një ndërhyrjeje për tumor në zorrën e trashë dhe trajtimit me kimioterapi.
“Miq, nuk kemi kohë që flasim për këtë. Dua t’ju bëj të ditur se jam shumë mirë. Ndihem çdo ditë më mirë“,-tha ish-sulmuesi 81-vjeçar në një mesazh të postuar në rrjetet e tij sociale.
Kampioni i tre herë i botës (1958, 1962 dhe 1970) i shoqëroi fjalët e tij me një fotografi në të cilën shfaqet me grushtin e majtë të ngritur, i pajisur me një maskë për t’u mbrojtur nga koronavirusi.
“Mendoj se as maska që përdor për t’u mbrojtur nuk mund ta fshehë lumturinë time. Shumë faleminderit të gjithëve që më dërgoni çdo ditë energji të mirë“, tha ai që konsiderohet si futbollisti më i mirë në histori.
Pele u shtrua në spital gjatë muajit shtator pasi zbuloi një tumor në zorrën e trashë në ekzaminimet rutinë, të cilat i kishte shtyrë për shkak të pandemisë, ndërsa disa ditë më pasi iu nënshtrua operacionit.
Spitali Albert Einstein në Sao Paulo, ku ai qëndroi i shtruar gjatë gjithë asaj kohe, raportoi atëherë se idhulli brazilian do t’i nënshtrohej trajtimit me kimioterapi.
Që nga largimi i tij nga klinika nuk ka pasur asnjë informacion mjekësor për gjendjen shëndetësore të ish-yllit të futbollit.
Pele është shfaqur në disa raste përmes rrjeteve të tij sociale për të qetësuar miliona ndjekësit e tij dhe për të komentuar mbi çështjet aktuale sportive.
Hera e fundit ishte të hënën e kësaj jave për të festuar “performancën e mrekullueshme” të shtatë herë kampionit të botës në Formula 1, Lewis Hamilton, pas fitores së tij të vështirë në Çmimin e Madh të Sao Paulo.
“Është shumë mirë të shohësh një pilot të F1 duke ngritur flamurin tonë në podium. Faleminderit që jeni ky që jeni”,-shtoi “O Rei”./K.T/Gijotina.com
Discussion about this post