9 ditë nga tragjedia në Mestre, ku humbën jetën 21 persona e 15 të tjerë mbetën të plagosur prokuroria e Venezias ka renditur në regjistrin e të hetuarve tre persona; Administratorin e kompanisë “La linea” në zotërim të të cilit ishte autobuzi, si dhe dy funksionarë të Komunës së Venezias, Drejtorin e sektorit të rrugëve e të qarkullimit rrugorë dhe Drejtorin e sektorit të mirëmbajtjes rrugore.
Ndaj tyre Prokuroria e çështjes Larua Camel hipotezon akuzat e vrasjes rrugore, vrasjes së shumëfishtë, plagosjes së rëndë e shumë të rëndë në rrugë e dëmtime personale nga pakujdesia.
Prej 1 muaji kishin nisur punimet rrugore në mbikalimin ku ndodhi tragjedia e autobuzi me 40 persona në bord u rrëzua nga një lartësi rreth 10 metra.
Ndërkohë ka përfunduar autopsia mbi trupin e shoferit i cili është një nga 21 viktimat e këtij aksidenti e analiza mjekoligjore ende nuk është bërë publike.
Prokuroria e Venezias po mbledh të gjitha informacionet e duhura si dhe me marrjen në pyetje të 3 personave të vënë së fundmi nën hetim, për të pasur një kuadër të plotë në zbardhjen e shkaqeve të këtij aksidenti.
Discussion about this post