Nga aeroporti i Rinasit ku doli në një konferencë të jashtëzakonshme për ngjarjen që tronditi Fierin, kryeministri Rama i pyetur se këto janë raste të përsëritura dhe se ai vetë është akuzuar në parlament për dhunë, tha se ka një mesazh për burrat.
Kreu i qeverisë shprehu keqardhjen për gjuhën që përdoret nga ligjvënësit, ndërsa sipas tij është kultura e trashëguar nga diktatura që dikton sjellje të tilla, duke mos pranuar mendimin ndryshe.
“Unë mendoj që politika me gjuhën e saj, me akuzat, kam parasysh atë burim të pasur të këtij pisllëku gjuhësor dhe jo të gjithë, kontribuon në ushqimin e një klime psikologjike të rënduar dhe është përgjegjësie madhe ta bësh këtë. Ashtu sikundër qysh në kohën e Romës, është përcaktuar vija ndarëse mes akuzuesve dhe të akuzuarve. Por barabaria e trashëguar nga regjimi komunist, por sidomos nga ai, ku u rrit një popull i tërë dhe posaçërisht e gjithë gjenerata e politikës së këtyre 30 viteve me asnjë ide për ekzistencën e të ndryshimit, rivalit, kundërshtarit në ide, por vetëm me ide se kush mendon ndryshe është armik, i cili duhet pushkatuar, burgosur, vazhdon ende të ketë bishtat e vet edhe në ditët e sotme. Është një çështje kulturore që nuk zgjidhet sa hap e mbyll sytë. Ne e shohim edhe sot dhe ju të gjithë jeni të detyruar që ta pasqyroni”, tha Rama.
Discussion about this post