Protestuesit kanë nisur të grumbullohen para Ministrisë së Arsimit në ditën e shtatë të protestës. Personat që janë mbledhur deri më tani kanë nisur vallen ndërkohë thërrasin në kor për ‘dorëheqje’.
Gjithashtu dëgjohet teksa thonë ‘policia e krimit’.
Teksa në duar mbajnë flamurin shqiptar ata shprehen se ‘ky është flamuri jonë, flamuri më i bukur në botë’.
“Respektoni flamurin”, dëgjohen të thonë të rinjtë, të cilët më pas nisin duke kënduar.
Gjimnazistë dhe studentë janë ulur këmbëkryq në rrugë dhe lëshojnë thirrje kundër qeverisë. Të rinjtë kërkojnë të drejtat e tyre dhe kundërshtojnë, siç shprehen, presionin dhe kërcënimet ndaj atyre që i bashkohen protestës.
Një gjimnaziste e vitit të tretë deklaroi se të rinjtë po detyrohen të largohen nga Shqipëria, ndërsa tregoi se familja e saj nuk e di që ajo ndodhet në protestë, pasi ka frikë nga reagimet.
“Duam të drejtat tona. Po na i vjedhin. Po na bëjnë që të ikim me zor jashtë shtetit. Si flenë gjumë ata policë, kur kanë fëmijë dhe vetë? Si nuk i vjen keq?! Jam gjimnaziste e vitit të tretë. S’e di asnjë nga familja ime që jam këtu. Kanë frikë nga ata që janë rreshtuar aty për të na rrahur ne. Ku do e kenë fytyrën ata që na rrinë përballë? Oficeri i shkollës sot na kërcënoi hapur se do të përjashtoheshim nga shkolla nëse i bashkoheshim protestës. Këto reagimet e Ramës janë kërcënime të pavlera. Do e shohë ai nesër, kur të bjerë nga pushteti, se kush është rinia shqiptare”, u shpreh gjimnazistja.
Discussion about this post