Protesta e opozitës përpara Kryeministrisë është shoqëruar me tensione, pasi mbështetës të Partisë Demokratike u kanë vënë flakën shilteve që kryeministri Edi Rama kishte vendosur rreth një sofre guri, si pjesë e ftesës së tij për dialog me studentët.
Kreu i qeverisë kishte zgjedhur këtë herë një tjetër mënyrë për t’i ftuar studentët në bisedime, pas refuzimit të karrigeve dhe stolave të vendosur ditët e mëparshme. Megjithatë, as kjo ftesë nuk është pranuar nga studentët.
Siç shihet edhe nga pamjet, protestuesit kanë marrë jastëkët që ishin para hyrjes së kryeministrisë dhe i kanë flakën në shesh.
Ndërkohë, kreu i Partisë Demokratike, Sali Berisha, nuk i është bashkuar protestës së opozitës, duke qëndruar në selinë blu.
Në krye të protestuesve përpara Kryeministrisë kanë qenë Flamur Noka, Klevis Balliu dhe Agron Gjekmarkaj, të cilët kanë përfaqësuar drejtuesit e PD-së në tubim.
Nga ana tjetër, studentët kanë shprehur kundërshtimin e tyre ndaj të dy krahëve të politikës. Përmes thirrjeve “Rama në burg, Berisha në burg”, ata kanë treguar se protesta e tyre nuk drejtohet vetëm kundër qeverisë, por edhe ndaj figurave të opozitës tradicionale.
Për t’iu bashkuar protestës kombëtare, mbështetës të Partisë Demokratike janë nisur drejt Tiranës nga qytete të ndryshme të Shqipërisë.
Discussion about this post