Republika Demokratike e Kongos ka realizuar një pjesë të parë të jashtëzakonshme ndaj Anglisë, duke e mbyllur 45-minutëshin e parë me epërsinë 1-0 në sfidën e fazës së 1/16-tës së Kupës së Botës.
Goli i avantazhit për skuadrën afrikane erdhi në minutën e 7-të nga Brian Cipenga.
Sulmuesi kongolez përfitoi nga një top i ardhur në hyrje të zonës dhe me një goditje të saktë e dërgoi topin në cepin e poshtëm të portës së Jordan Pickford.
Pas golit të pësuar, Anglia mori kontrollin e lojës dhe nisi presionin ndaj mbrojtjes së Kongos, por pa arritur të gjejë rrugën drejt rrjetës.
Jude Bellingham pati një rast të artë në minutën e 30-të, por goditja e tij me kokë u ndal nga një pritje spektakolare e portierit Lionel Mpasi-Nzau.
Momenti më i afërt me barazimin për “Tre Luanët” erdhi në fund të pjesës së parë, kur Harry Kane goditi nga një distancë shumë e afërt, por sërish portieri kongolez ishte në lartësinë e duhur dhe shpëtoi skuadrën e tij.
Nga ana tjetër, Kongoja tregoi se nuk ishte vetëm në mbrojtje dhe pati mundësinë për të dyfishuar avantazhin. Yoane Wissa goditi shtyllën në minutën e 42-të pas një kundërsulmi të shpejtë.
Anglia kërkoi një penallti pas një kontakti me Harry Kane në zonë, por pas rishikimit të VAR-it, arbitri Adham Makhadmeh vendosi të vazhdojë lojën.
Kongoja po zhvillon një paraqitje perfekte taktike, ndërsa Anglia duhet të ndryshojë diçka në pjesën e dytë për të shmangur një eliminim të bujshëm nga Kupa e Botës.
Discussion about this post