Rihapja “21 Janarit”, bashkëshortja e Aleks Nikës përfundon dëshminë në SPAK

Ka përfunduar marrja e dëshmisë në SPAK e Rajmonda Nikës, bashkëshortes së Aleks Nikës, i cili u vra në protestën e 21 Janarit 2011 në bulevardin përballë Kryeministrisë.

“Dhashë sqarime dhe disa fakte të reja, audiopërgjimin do ta dorëzojmë një ditë tjetër”, tha Nika për gazetarët pas daljes nga SPAK. Ajo ishte e shoqëruar edhe nga xhaxhai i Aleksit, Mark Nika.

Thirrja në SPAK e familjarëve të Aleks Nikës vjen pas vendimit të Gjykatës së Lartë për rihapjen e çështjes së 21 janarit nga kjo prokurori.

Prokuroria e Posaçme kundër Korrupsionit dhe Krimit të Organizuar në datën 15 korrik ka regjistruar procedimin penal për veprat penale: “Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave, “Shpërdorim i detyrës”, e kryer në bashkëpunim dhe “Kryerja e veprimeve që pengojnë zbulimin e së vërtetës”, e kryer në bashkëpunim, në lidhje me 3 protestuesit e vrarë në tubimin e 21 janarit 2011.

Në njoftim zyrtar thuhet se nisja e hetimeve është bërë duke vlerësuar konkluzionet e vendimit të Gjykatës së Lartë pas kallëzimit te shtetases Rajmonda Nika si dhe vendimin e Gjykatës Evropiane per te drejtat e njeriut. Hetimet për 21 janarin e vitit 2011 nisin pas kërkesës së familjarëve të Aleks Nikës në Gjykatën e Lartë.

Si Gjykata e Lartë edhe SPAK përmend vendimin e Gjykatës Europiane që në nëntor 2023 tha se nuk ishte zbardhur përgjegjësia e mundshme e zinxhirit komandues të Gardës.

Në këtë vendim të Strasburgut ku u tregua se shteti kishte dështuar për ta hetuar demonstratën e 21 janarit 2011 thuhet se hetimi ishte ishte përqendruar në përgjegjësinë individuale të oficerëve të Gardës dhe jo në sekuencën apo natyrën e urdhrave që mund të ishin dhënë nga zinxhiri komandues.

Si probleme të tjera u numëruan fshirja e regjistrimeve të incidentit dhe mos ndjekja e pistave kyçe të hetimit si shenjat e plumbave të gjetura në lartësinë e njeriut në gardhin e hekurt që rrethon Kryeministrinë.

Këto mangësi ngritën dyshimin se autoritetet ishin përpjekur ta devijonin apo të ndërhynin në hetim – konsideroi Strasburgu.

Nga vrasja e katër demonstruesve në bulevard drejtësia ka zbardhur vetëm dy prej tyre , të Ziver Veizaj dhe Faik Myrtaj, ndërsa mbeten ende pa autor vrasja e Aleks Nikës dhe Hekuran Dedës.

Por familjarët e katër viktimave kërkojnë që tanimë hetimit të zbulojë edhe funksionarët që urdhëruan për tu qëlluar me armë zjarri.