U duk sikur Shqipëria e mbylli luftën me zjarret, por me aktivizimin e tre vatrave të reja sot, na rezulton e kundërta. Ditën e sotme u raportuan tre vatra të reja zjarri, konkretisht në Ballsh, Memaliaj dhe Vlorë, të cilat kanë djegur qindra rrënjë ulliri dhe kanë rrezikuar disa shtëpi.
Rreth orës 13:00 u raportua vatra e parë e zjarrit, e cila ishte aktivizuar në lagjen ‘Bylis’, të Ballshit, në një sipërfaqe me ullinj. Flakët, të favorizuara nga era e fortë, kanë 150 rrënjë ullinj dhe disa shkurre. Zjarri ishte aktivizuar pranë banesave, por që u izoluan nga forcat zjarrfikëse që kanë shkuar menjëherë në vendngjarje.
Vatra e dytë u raportua rreth orës 15:42, ku një zjarr masiv është aktivizuar në fshatin Zhulaj, në Memaliaj. Edhe këtu flakët janë favorizuar nga era e fortë dhe se prej orësh të tëra kishte djegur një sipërfaqe të konsiderueshme me pemë e bimësi. Zjarri u vu nën kontroll nga forcat zjarrfikëse.
Ndërsa vatra e tretë u raportua rreth orës 18:20, në lagjen “11 janari” në Vlorë. Sipas burimeve zjarri ishte i qëllimshëm dhe u dogjën dhjetëra rrënjë ullinj, shkurre e bimësi. Menjëherë në vendngjarje ka mbërritur zjarrfikësja, në ndihmë të banorëve të zonës.
Zjarret kanë qenë shumë aktive gjatë muajit gusht, duke rrezikuar banesa dhe janë djegur me mijëra hektar pyje dhe kullota./Gijotina.com
