Sistemi TIMS ka rënë në të gjitha pikat kufitare, sulm që ka rikthyer hakerat iranianë. Mësohet se fillimisht probleme hasi pika kufitare në Kakavijë e më pas nisi tek të gjitha të tjerat. Aktualisht mësohet se po punohet në mënyrë manuale. Probleme me sistemin TIMS ka pasur edhe Porti i Durrësit. Nuk dihet ende nëse nga kjo problematikë janë cënuar të dhëna dhe nuk ka një reagim nga ana e autoriteteve.
Ky sulm rikthen sërish në qendër të vëmendjes hakerat iranianë që dy ditë më parë publikuan numrat e celularëve të qytetarëve shqiptarë. Databaza e publikuar kishte të dhëna të tjera, si numri i kartës së identitetit dhe pasaportës. Krahas numrave, hakerat kishin vendosur edhe të dhënat personale si emër, mbiemër, emrin e nënës dhe babait, datëlindjen dhe datën kur është regjistruar numri i celularit të qytetarit.
Sulmet nga hakerat kanë nisur prej muajsh. Më 9 shtator sistemi TIMS në pikat e kalimit kufitar u godit nga një sulm kibernetik. Dosja.al arriti të siguronte mesazhin e dërguar në kompjuterët e policëve në pikat e kalimit kufitar u ishte shkruar “Shqipëria po vuan dhe do të vuajë ende përkrahjen që i ka dhënë iranienëve të MEK”. Por gjatë kësaj kohe, hakerat kanë nxjerrë të dhëna të tjera, lidhur me sistemin MEMEX apo dhe të TIMS, por asnjëherë nuk janë pranuar nga qeveria si sistemet zyrtare ku ruhen të dhënat e Policisë së Shtetit.
Discussion about this post