Kushtet e paqëndrueshme atmosferike janë rikthyer në vendin tonë. Që prej paradites e deri në orët e vona të pasdites, Shqipëria pritet të jetë nën ndikimin e vranësirave dhe reshjeve të shiut, të cilat herë pas here do të shoqërohen me rrebeshe dhe stuhi të forta. Gjatë mbrëmjes pritet përmirësim i motit.
Ndërkohë, reshjet e dendura të shiut kanë shkaktuar probleme në disa qytete bregdetare. Në Vlorë, që në orët e para të mëngjesit, rreth orës 05:25, u regjistruan përmbytje në disa zona. Lagjja “Pavarësia 3”, zona pranë stadiumit “Flamurtari”, Bulevardi Kryesor dhe rruga “Gjergj Arianiti” u mbuluan nga uji. Nën ujë mbetën gjithashtu edhe lagjet “28 Nëntori”, “Pavarësia” dhe “Kushtrimi”, ku ujërat vijojnë të jenë të pranishme në rrugë.
Reshjet e dendura të shiut kanë krijuar vështirësi në qarkullimin e këmbësorëve dhe mjeteve që në orët e para të mëngjesit të sotëm edhe në Durrës.
Shumë kryqëzime rrugësh janë nën pushtetin e ujit, ndërsa sikurse duket në pamje, edhe automjetet kanë mbetur të bllokuara.
Reshjet kanë krijuar probleme në shumë akse rrugore, përfshirë dhe nënkalimin te Veliera në lagjen nr. 1 të Durrësit pranë portit.
Sipas raportimeve nga qytetarët, nënkalimi është bllokuar nga reshjet dhe policia ka ndaluar qarkullimin në të dy kahet e lëvizjes.
Discussion about this post