Situata e zjarreve në Shqipëri sa vjen dhe rëndohet akoma më tepër, duke shkaktuar kështu probleme të mëdha materiale por edhe mjedisore.
Ditën e sotme, kanë nisur dy vatra zjarri në fshatrat Panaja dhe Bishan ku u dogjën një ullishte dhe një stan.
Në gjendje kritike ndodhet Panaja, ku burimet për Gijotina.com raportojnë se situata e deritanishme është shumë e rëndë.
Zjarri ka bllokuar rrugën e vjetër nacionale Vlorë-Fier, duke detyruar mjetet që të kalojnë përmes flakëve. Nëse përhapja ndodh me këtë shpejtësi, mund të rrezikohet fshati Bestrovë, që ndodhet vetëm 2 kilometra larg vatrës së zjarrit.
Për shkak të terrenit të vështirë, ndërhyrja me forcat zjarrfikëse nuk mund të bëhet dot, ndaj aktualisht kërkohet ndihmë nga ajri, për të shuar flakët me helikopter.
Por nuk mbaron këtu!
Ditën e sotme është djegur gjithashtu edhe një magazinë me baza ushqimore për blegtorinë, në fshatin Bubq të rrethit të Krujës, ku mësohet se mund të ketë marrë flakë nga pakujdesia e punëtorëve që po rregullonin çatinë e godinës.
Nga zjarri janë shkrumbuar me mijëra dënga jonxhë të cilat ishin magazinuar për dimër në stallën e dhive.
Përfshirja e Shqipërisë nga veriu në jug nga zjarret, nxorri në dritë mungesën e mjeteve për t’i shuar ato brenda një kohe sa më të shkurtër, duke e lënë vendin në një katrahurë dhe mizori për qytetarët e rrezikuar. / Gijotina.com
