Ditën e djeshme qeveria ka publikuar në Fletoren Zyrtare aktin normativ të ndryshuar për buxhetin e vitit 2021. Deri më tani ky buxhet është ndryshuar për herë të gjashtë, ndërsa këtë herë është bërë për shpërndarjen e fondeve të mbetura në sektorët që kanë më shumë nevojë.
Ajo që bie në sy është se është vendosur të shtohen të ardhurat për procesin e rindërtimit me 7 miliardë lekë ose rreth 58 milionë euro më shumë vetëm për vitin aktual. Konkretisht shpenzimet për rindërtimin këtë vit ishin parashikuar në vlerën e 28 miliardë lekë, ndërsa me rishikimin e fundit buxheti ka arritur në 35 miliardë lekë. Fondi i rindërtimit përdoret për të përballuar pasojat e tërmetit të 26 nëntorit 2019, dhe shkon për ndërtimin e objekteve të reja jo vetëm për banesa por edhe për shkolla, kopshte apo çerdhe. Por, ashtu sikur edhe denoncojnë qytetarët që janë prekur nga tërmeti i dy viteve më parë, fondet shtohen por banesa janë ndërtuar shumë pak në raport me çka është premtuar dhe parashikuar nga qeveria në fillim të këtij viti.
Sipas të dhënave të Ministrisë së Financave, deri në fund të tetorit, për procesin e rindërtimit ishin shpenzuar në total 22 miliardë lekë. Deri në fund të nëntorit ishin dorëzuar mbi 1400 apartamente për familjet, shtëpitë e të cilave u shembën nga tërmeti, por me mijëra familje të tjera po presin prej dy vitesh dhe në shumë zona nuk është dhënë asnjë informacion se kur do të fillojë ndërtimi i shtëpive të tyre. Madje në Tiranë dhe Durrës është raportuar herë pas herë se familjet e prekura nga tërmeti kanë pasur probleme edhe me bonusin e qirasë, i cili iu vonohet më shumë se dy muaj.
Discussion about this post