RMV, dorëhiqet ministri i Bujqësisë dhe dy zv/ministra

Dy zëvendës ministra dhe një ministër kanë hequr dorë nga posti i tyre pas tensioneve politike në Maqedoninë e Veriut.
Ministri i Bujqësisë i Maqedonisë së Veriut, Arjanit Hoxha, i cili është nga radhët e Lëvizjes BESA, ka njoftuar dorëheqjen nga posti i ministrit. Ai argumentoi se ky vendim vjen pasi në zgjedhjet e fundit lokale të mbajtuara në vend është cënuar demokracia
Hoxha njoftoi dorëheqjen e tij në një konferencë për media dorëheqjen e njoftoi në një konferencë për media para ndërtesës së qeverisë së Maqedonisë së Veriut.
Por Hoxha nuk është i vetmi nga rradhët e kësaj lëvizjeje që ka dorëzuar dorëheqjen. Zv ministri i Kulturës, Sadat Sulejmani dhe zv/ministri i Shkencës dhe Arsimit, Arafat Shabani, njoftuan gjithashtu lënien e detyrës.
Në fjalën e tij Hoxha akuzoi qeverinë e Zaev që po përdor çdo lloj mjeti jodemokratik për mbajtjen e pushtetit.
“Për shkak të cenimit të demokracisë në zgjedhjet lokale nga një pjesë e këtij pushteti, me në krye zv/kryeministrin nga BDI-ja, ku u cenua e drejta e demokracisë në vend me metoda manipuluese që vazhdoi për fat të keq edhe gjatë ditës së djeshme, që ishte dita më e turpshme e demokracisë së këtij vendi, unë jap dorëheqje nga pozita e ministrit së bashku me dy zv/ministrat në qeveri, pasi që nuk mund të identifikojmë veprimin tonë politik të Lëvizjes BESA me një partner koalicioni i cili po shihet qartë se përdor çdo veprim jodemokratik me të vetmin qëllim, mbetjen në pushtet”, tha Hoxha
Ai theksoi se vendimi për dorëheqje është akt moral, por edhe duke respektuar organet partiake të Lëvizjes BESA.
“Në Lëvizjen BESA funksionojmë mbi parimin e krenarisë dhe dinjitetit. Pushteti për ne nuk është gjithçka. Për ne pushteti është mundësi për të treguar se mund të punohet në interes të qytetarëve”, tha Hoxha.
Lëvizja BESA ishte pjesë e koalicionit qeverisës deri në zgjedhjet e fundit lokale, pas të cilave vendosi të bashkohet me shumicën e pretenduar të re në Kuvendin e Maqedonisë së Veriut duke nënshkruar mocionin e mosbesimit ndaj qeverisë së bashku me deputetët e partive opozitare, VMRO-DPMNE-së, Aleancës për Shqiptarët, Alternativës dhe Të Majtës.
Dorëheqja e ministrit Hoxha dhe dy zv/ministrave nga radhët e partisë së tij që të hyjë në fuqi duhet të konstatohet në Kuvendin e Maqedonisë së Veriut.
Ditën e djeshme opozita e Maqedonisë së Veriut do të mbante kuvendin për nocionin e mosbesimit të qeverisë Zaev, iniciativë e cila nuk u finalizua pasi opozita nuk kishte 61 votat e nevojshme për të rrëzuar qeverinë.