Është emri më i theksuar i ditëve të fundit në raport me Real Madridin e sezonit të ri. Kylian Mbappé është bërë sërish lajmi i verës, madje edhe mbi një super nënshkrim si Jude Bellingham apo rikthimet e lojtarëve si Brahim e Fran García.
Një nga të fundit që u prononcua për nënshkrimin e francezit ka qenë Rodrygo. Braziliani e ka pranuar se do të ndihej “shumë i lumtur” nëse Kylian do të zbarkonte në Bernabéu këtë verë.
“Mbappe? Do të isha i lumtur nëse ai do të vinte, aq më tepër me largimin e Karimit. Siç thashë, ai është një nga më të mirët në botë dhe pa dyshim do të na ndihmonte shumë, por ne duhet të respektojmë kontratën e tij me PSG-në”, ka treguar lojtari i Real Madridit, i cili pastaj vazhdoi:
“Nga 1 deri në 10, sa dëshirë kam që të luaj me Mbappé? 10. Është një fenomen. Një nga më të mirët në botë”, ka deklaruar para shtypit numri i ri ‘11’ i mbretërorëve.
Rodrygo e bëri të qartë se Real Madridi, pas largimit të Benzemasë, ka nevojë për një golashënues, një lojtar të madh dhe emri i Mbappe është ai që e emocionon më shumë.
“Ne kemi nevojë për një lojtar në atë pozicion. Unë me të vërtetë dua që Mbappé të vijë”, tha ai.
Discussion about this post