Ramazan Raja, i shpallur në kërkim nga policia për ngjarjen e ndodhur në Lezhë, ku së bashku me dy shokët e tij akuzohet se ka hyrë i maskuar dhe armatosur në një lokal duke terrorizuar të pranishmit, ka dhënë versionin e tij të historisë. Ai shprehet se natën e ngjarjes ka qenë në shtëpi dhe këtë mund ta vërtetojë nga fotot dhe videot që ka në aparatin e tij celular.
Ramazan Rraja mohon në mënyrë kategorike përfshirjen në këtë ngjarje, teksa thekson se ndodhet në Dubai që nga muaji gusht dhe kalimin drejt Emirateve të Bashkuara e ka bërë në formë legale, gjë e cila sipas tij mund të vërtetohet lehtësisht nga të dhënat në pikat doganore nga ku ai ka ushëtuar.
Ai shprehet se kjo është një ngjarje e stisur, teksa tregon se avokati i tij pas publikimit në media është drejtuar në policinë e Lezhës për të kërkuar fakte që vërtetojnë përfshirjen e Rrajës në këtë ngjarje. Ai shpreh gadishmëri të plotë për tu paraqitur para drejtësisë, por me kusht që organet kompetente të ofrojnë provat që implikojnë atë në këtë ngjarje të bujshme.
“Është një ngjarje e stisur nga policia e prokuroria. të më nxjerrin një fakt apo provë, dhe jam gati të paraqitem para drejtësisë, të marr dënimin maksimal. Aktualisht ndodhem në Dubai, jetoj këtu prej gushtit të këtij viti. Nuk jam arratisur nga Shqipëria, hyrje daljet e mia mund të verifikohen lirshëm.
Natën e ngjarjes që flet policia, për të cilën më ka ngritur akuzë, kam qenë në shtëpinë time, kam video e foto për këtë, dhe prokuroria e policia e dinë shumë mirë, sepse më kanë thënë telefoni im është në përgjim. E kanë kollaj për ta zgjidhur këtë cështje.”- u shpreh Rraja.
Ai gjithashtu kërkon që xhaxhai i tij, deputeti Rrahman Rraja të mos bëhet pjesë e diskutimeve që kanë në fokus atë si individ.
“Sa i takon, xhaxhait tim deputet dua që mos të përmendet emri i tij, nuk kam asnjë lidhje me të, asnjë lloj kontakti. Ai është i zgjedhur i popullit, nuk dua të përfshihet në këtë ngjarje.
Është një ngjarje e stisur, nga njerëz që policia e di shumë mirë. Nuk e kam idenë kush janë njerëzit në lokal, nuk kam qenë kurrë në atë fshat të Lezhës. Kam çuar avokatin tim në polici, të më japin qoftë edhe një provë të vetme, dhe jam i gatshëm të vi, i hipi avionit menjëherë dhe vi paraqitem para drejtësisë.
Dikush ka akses shumë të fortë te policia e Lezhës, kundrejt rryshfetit terorrizojnë familjen time. Një e dy më nxjerrin emrin në media. Policia e prokuroria të bëjnë punën e tyre, të keni një provë e fakt, dhe jo gojëdhënat, nga goret e Kurbinit. Nuk kam konflikt me njeri, lëviz i qetë.”, shprehet Rraja.
Discussion about this post