SPAK ka kërkuar burgim të përjetshëm për Festim Bexhdilin, i akuzuar për rrëmbimin me pasojë vdekjen të Jan Prenges, janarin e vitit 2020.
Për të bashkëpandehurin e tij, Olsi Turja, i akuzuar për “pengim të zbulimit të të vërtetës” u kërkua një dënim me 3 vite burg.
SPAK: Pengmarrja Prengës u porosit nga Rexhepi dhe Doçaj
Sipas SPAK pengmarrja e Jan Prengës u porosit nga Dritan Rexhepi dhe Gentjan Doçaj, ndërsa ka ndodhur për shkak se i vëllai i tij Astrit Prenga kishte vjedhur një sasi kokaine në Britani. Jan Prenga u rrëmbye në Kamëz më 17 Janar 2020, dhe prej gati 2 vitesh trupi i tij nuk është gjetur akoma. Kompleksi ‘Golden’ në Shijak u kthye ne skenën e krimit për Jan Prengën, ndërsa policia me anë të pamjeve filmike provoi praninë e trupit të tij dhe vendosi pas hekurave Leonard Hajri, Bajram Hajri, Festim Bexhdili, Olsi Turja si dhe Ardian Docaj, ndërsa sot në burg ka mbetur vetëm Festim Bexhdili. Tashmë, edhe sipas SPAK, ai u ekzekutua me urdhër nga “kokat” e bandës, për shkak të një sasie prej 283 kg kokainë, që vëllai i Jan Prengës, Astrit mbante peng në Angli dhe nuk e tregonte se ku e kishte çuar. Ky i fundit është arrestuar në Angli, dhe pret që të marrë dënimin nga autoritetet britanike. Jan Prenga u mor peng në 17 janarin e 2020, dhe më pas u torturua në një kompleks në Shijak, ku sipas policisë u vra dhe trupi u zhduk nga autorët e dyshuar.
Ngjarja
Jan Prenga u rrëmbye në Kamëz më 17 Janar 2020, ndërsa më 5 shkurt 2020 Doçaj sapo mbërriti nga Vjena u vu në prangat e policisë. Prej më shumë se një viti trupi i Jan Prengës nuk është gjetur ndërsa policia ndër emrat e dyshuar për rrëmbimin dhe vrasjen e tij ka edhe pjesëtarë të familjes Hajri në Shijak. Konkretisht, lidhur me këtë ngjarje në atë kohë, kanë përfunduar në prangat e policisë katër persona, dy vëllezërit Elton e Leonard Hajri si dhe babai i tij Bajram Hajri respektivisht 32, 35 dhe 64 vjeç. Gjithashtu si bashkëpunëtor për ngjarjen e rëndë u arrestua edhe 36-vjeçari Olsi Turja. Ndërsa dje emrat e sipërpërmendur janë liruar me vendim nga Gjykata e Posaçme, në burg ka mbetur vetëm kopshtari i kompleksit “Golden” ku mendohet se është kryer krimi. Rrëmbimi i Prengës ka ndodhur si pasojë e një konflikti që një nga vëllezërit e viktimës ka pasur me pengmarrësit, si pasojë e prishjes së disa pazareve të drogës në Britaninë e Madhe.
Discussion about this post