Situata nga reshjet e dendura të shiut në qarkun e Korçës mbetet delikate. Problemet më të mëdha raportohen në Pogradec, ku në fshatin Dardhas ka pasur një rrëshqitje masive të rrugës.
Ky aks është bërë i pakalueshëm, duke izoluar 5 fshatra të zonës, ndërsa po punohet me mjete të rënda për të krijuar një rrugë kalimi provizore. Po ashtu, lumi i Starovës ka dalë nga shtrati duke vërshuar në të dyja anët e rrugës.
Edhe në Bashkinë e Korçës dhe të Devollit ka prani të ujit pranë banesave, specifikisht në fshatrat Çiflig, Shamoll dhe Proger.
Në këtë të fundit, qendra e fshatit është e pakalueshme për mjetet e vogla, ndërsa policia dhe ekipet e emergjencave janë në gatishmëri. Situatë e vështirë paraqitet edhe në aksin Qafë Plloçë–Qukës, ku rënia e gurëve dhe rrëshqitja e dherave pranë tuneleve ka vështirësuar qarkullimin.
Për sa i përket energjisë elektrike, qindra abonentë në zonën e Lozhanit janë aktualisht pa drita për shkak të defekteve në rrjet, ndërsa ekipet e OSHEE-së ndodhen në terren.
Në akset e tjera si Maliq-Gramsh dhe Ersekë-Leskovik ka pasur rënie gurësh, por ndërhyrja e kontraktorëve ka bërë që rrugët të mbeten të hapura. Autoritetet u bëjnë thirrje qytetarëve të bëjnë kujdes gjatë lëvizjeve deri në normalizimin e plotë të gjendjes.
Discussion about this post