Rrinë zgjuar tërë natën, 50 shtëpi të vjedhura në Shënkoll, banorët: Shteti të vëjë dorë

Banorët e Shënkollit në Lezhë flenë me frikën e sulmeve nga grabitësit serialë.

Prej dy muajsh 50 banesa janë grabitur në këtë zonë. Hajdutët nuk kursejnë asgjë, ata marrin çfarë të gjejnë, kryesisht bagëti e mjete pune.

Grabitja e fundit ndodhi para disa ditësh në shtëpinë e dy grave. Në një deklaratë për mediat ato tregojnë tmerrin që kanë përjetuar. Teksa i druhen përsëritjes së këtyre situatave të frikshme, ato shprehen se detyrohen të flenë veshur.  

“Flej e veshur, se vijnë dhe më gjenë zhveshur. Një javë para më kanë helmosur 3 qen”.

“Kemi frikë, s’kemi çfarë bëjnë”.

Në një rast hajdutët kanë marrë dhe një makinë.

“Më kanë vjedhur një makinë, gjeneratorin e dritave, kanë hapur magazinën dhe kanë marrë çfarë kanë gjetur…”.

Banorët  janë të shqetësuar dhe i kërkojnë ndihmë policie.

“I bëjmë thirrje shtetit të vënë dorë dhe të rregullojnë disa ligje”.

Dy ditë më parë në fshatin ngjitur Zejmen, banorët arritën të kapnin hajdutin, të cilin ia dorëzuan policisë.