Ministri i Brendshëm i Francës, Gerald Darmanin, ka anuluar bisedimet me homologen britanike, Priti Patel, pasi kryeministri britanik, Boris Johnson, i bëri thirrje Francës që të tërheqë emigrantët që kanë kaluar Kanalin Anglez dhe që janë futur në territorin e Mbretërisë së Bashkuar.
Pas ngjarjes tragjike të mbytjes së 27 personave në Kanalin Anglez, ministri francez tha se Franca është e zhgënjyer nga plani i kryeministrit britanik.
Johnson tha se i ka shkruar letër presidentit francez, Emmanuel Macron, duke propozuar pesë hapa për të “lëvizur më tutje dhe më shpejt” dhe për të shmangur përsëritjen e tragjedisë së të mërkurës, kur vdiqën 27 persona, shkruan BBC.
“Një marrëveshje me Francën për t’i ndalur emigrantët që kalojnë Kanalin përmes kësaj rruge të rrezikshme do të kishte ndikim të menjëhershëm dhe të konsiderueshëm”, thuhet në letrën e kryeministrit britanik.
Ministria e Brendshme e Francës përmes një deklarate tha: “Letrën e Boris Johnsonit e konsiderojmë të papranueshme dhe në kundërshtim me diskutimet mes palëve. Si pasojë, Priti Paten nuk është e ftuar në takimin e së dielës, që do të zhvillohen mes Francës, Belgjikës, Holandës, Gjermanisë dhe Komisionit të BE-së.”
Incidenti i së mërkurës ishte më i rëndi me emigrantë në Kanalin Anglez që është regjistruar ndonjëherë dhe përfshiu 17 burra, shtatë gra, njëra prej të cilave shtatzënë, dhe tre fëmijë.
Discussion about this post