Në qytetin e Kukësit, është rritur çmimi i bukës masive me 10 lekë duke e shtrenjtuar edhe me shumë koston e jetesës së qytetarëve kryesisht për shtresat e varfra.
Sipas qytetarëve ndryshimi i çmimit të bukës ka një ndikim në koston e përditshme duke shtrenjtuar jetesën, ndërsa ankohen se me rritjen e çmimit të bukës por edhe produkteve të tjera ushqimore, jetesa do të bëhet e papërballueshme.
“Ma keq nuk shkon më. Nuk ke çfarë bën, nuk kemi kujt ti kërkojmë llogari. Ne konsumojmë shumë bukë, por nuk është e drejtë kjo punë me shtetin tonë nuk jemi kurrkund në terezi.”
“Ne jemi pensionistë. Nuk e përballojmë dot sepse jemi shumë të sëmurë. Nuk kemi nga ti gjejmë të ardhurat dhe pensioni ka dy vite që nuk na rritet.”- thonë qytetarët.
Arsyeja kryesore është rritja e çmimit të miellit në tregun vendas me 5 lekë/kg që në fillim të muajit gusht. Shkak për këtë është bërë shtrenjtimi i miellit, si pasojë e mungesës së grurit që importojnë nga jashtë.
Me gjithë pretendimet e pronarëve të furrave të bukës dhe shqetësimet e ankesat e qytetarëve, përsëri, çmimi i bukës pritet të rritet nga dita në ditë.
