Numri i të vdekurve nga një tërmet shkatërrues në Japoninë qendrore u rrit në 92 të premten ndërsa 242 persona rezultojnë ende të zhdukur, thanë autoritetet rajonale. Shpresat për të gjetur të mbijetuar po zbehen ndërsa mijëra shpëtimtarë vijojnë kërkimet për katër ditë pas tërmetit 7.5 ballë në ditën e Vitit të Ri.
Forcat Vetëmbrojtëse të Japonisë dyfishuan numrin e trupave që po marrin pjesë në operacionin e kërkim-shpëtimit në 4600, njoftoi agjencia e lajmeve Kyodo.Shumë njerëz mendohet se janë të bllokuar nën shtëpitë e tyre të shembura – kryesisht në qytetet Suzu dhe Wajima.
Dhjetëra mijëra banorë janë ende pa energji dhe ujë, ndërsa qindra mbeten të izoluar nga ndihma për shkak të rrëshqitjeve të dheut dhe rrugëve të bllokuara. “Ne nuk do të dorëzohemi,” tha kryeministri japonez Fumio Kishida pas një takimi me zyrtarët e reagimit ndaj fatkeqësive të premten.
Tërmeti i së hënës shkaktoi gjithashtu një cunami të vogël që përmbyti të paktën 296 hektarë tokë, sipas ministrisë japoneze të tokës.
Discussion about this post