Gjatë fjalës së saj sot në Komisionin e Ekonomisë, ministrja e Financave Delina Ibrahimaj ka pranuar se rritja e çmimeve në këtë fazë rrezikon konsumin. Ajo tha se ky do të ishte një problem për rritjen ekonomike, pasi konsumi është një indikator i rëndësishëm. Gjithsesi, Ibrahimaj tha se me qëllim përballimin e kostove të shtuara, sipas ministres së Financave Delina Ibrahimaj u vendos edhe indeksimi i pensioneve me 3.3% dhe jo 2.4% sa ishte parashikuar fillimisht.
“Problematika kryesore është nxitja e konsumit dhe mos lejimi i rënies së konsumit të brendshëm dhe kjo është arsyeja se pse ne kemi ndërhyrë me subvencione. Është e kuptueshme që në momentin e parë çmimet e larta mund të sjellin të ardhura shtesë, por me kalimin e kohës dhe me fillimin e ndikimit të këtyre çmimeve në konsumin vendas dhe në kërkesën e huaj do të materializohen në një reduktim të të ardhurave pasi do të ketë kërkesë më të ulët si nga brenda dhe nga jashtë, dhe shpenzimet konsumatore dhe kërkesa e huaj ulet dhe reduktohet Prodhimi i Brendshëm Bruto. Sigurisht që nuk është pozitive për asnjë buxhet kriza ekonomike e cila ka nisur”, tha Ibrahimaj. Ndërsa anëtarët e opozitës thanë se paketa sociale nuk ndihmon konsumin, por ishte thjeshtë propagandë.
Discussion about this post