Bojkotit të supermarketeve në Kroaci, më pas në Malin e Zi, Maqedoninë e Veriut si dhe Kosovë më datë 10 shkurt, i është bashkuar dhe Shqipëria. Rritja e çmimeve dhe pagat e ulëta janë dy arsyet kryesore, që kanë ndikuar në ekonominë e familjeve shqiptare.
“Shqipëria është i vetmi vend në botë që çmimet ngrihen dhe nuk ulen asnjëherë në nivelet e mëparshme. Nëse shohim të dhënat e INSAT produktet e importit nuk kanë pasur rritje, ndërsa nëse shohim shifra të tjera, ka rritje çdo muaj…Rrjetet e marketeve kanë gjetur mundësinë të abuzojë me çmimet duke qenë se jemi ndër vendet më të varfra”, thotë Granit Sokolaj, drejtor ekzekutiv i Qendra Alert.
Edhe pse jemi në një treg të lirë, ku gjithçka shkon në bazë të kërkesë-ofertës, përsëri mungesa e kontrolleve nga ana e institucioneve, ka nxitur supermarketet por dhe tregjet e hapura, të abuzojnë me çmimet.
“Institucionet janë, por është neglizhenca, që mund të mbajnë çmimet në kontroll. Tregu është i lirë, kërkese-ofertë, por kur të gjitha rrjetet e marketeve kanë rritje masive, sigurisht që konsumatorët nuk kanë ku të drejtohen tjetër… Po i biem gomarit, në thonjëza, për të dëgjuar samari, pra institucionet publike”, shprehet Sokolaj.
Nëse do të ketë ndërgjegjësim nga qytetarët, rezultatet e bojkotit do të ndihen menjëherë. Në Drejtorinë e Tatimeve, për shkak të sistemit të fiskalizimit, të dhënat për shitje shkojnë në kohë reale, duke bërë një krahasim para datës 16 dhe pas saj.
/Euronews Albania/
Discussion about this post