Ditën e nesërme kryeministri Edi Rama do të prezantojë planin për përballimin e krizës energjetike.
Kryeministri i Shqipërisë, Edi Rama, në një intervistë për emisionin “Zonë e Lirë”, u shpreh se gjatë dimrit nuk do të ketë ndërprerje të energjisë elektrike për shkak të krizës.
Rama thotë se ndërprerjet mund të vijnë për arsye teknike, pasi sipas tij sistemi ynë i shpërndarjes kërkon investime.
“E para sa i takon çmimit, nesër unë do të dal për të ndarë me opinionin publik planin që kemi bërë gati. Kjo është emergjencë, kriza është reale, çmimet janë rritur në mënyre eksponencial dhe ne prekemi sepse ne dalim në treg. Ne jemi të detyruar të blemë energji elektrike. Ne nuk varemi nga uji, por nga shiu. Të varesh nga uji do të thotë të kesh një sistem ku ti ta mbash ujin rezervë. Ne nuk e kemi këtë sistem. Prandaj ne po krijojmë Skavicën për të ruajtur ujin, që tani po e sheshim lirë.
Nuk ka arsye të ikin dritat. Ikje dritash për arsye teknike ka pasur dhe do ketë, sepse gjithë sistemi ynë i shpërndarjes kërkon investime. Ka defekte që janë teknike, por që nuk ka lidhje me këtë që po flasim. Kufizime energjie për shkak të krizës, nuk do ketë. Askush nuk ka thënë që do ketë kufizime. Ka disa vende që kanë bërë planin e kufizimeve, Britania e Madhe e ka bërë planin”, tha Rama.
Më tej kryeministri sqaroi edhe faktorët që ndikojnë në Shqipëri për rritjen e çmimit. Sipas tij, Shqipëria varet nga tregu ndërkombëtar.
“Janë shumë faktorë që ndikojnë në rritjen e çmimit. Gjithë kontinenti ynë dhe që do të thotë gjithë Evropa e bashkuar e ka varësinë nga gazi 95%. Ne kemi varësi nga tregu ndërkombëtar sepse nuk kemi mjaftueshëm këtu për shkak të thatësirës.
Tjetra është mbyllja e një sërë sistemesh të energjisë më qymyr. Në Britani mbyllën një termocentral që tani e kanë rindezur. Gjermania po e vuan po njësoj. Gjermania po vuan sepse mbylli centralet nukleare.
Ajo që thonë ekspertët e kësaj fushe është që parashikimi që kjo krizë në fazën e vetë të kësaj krize do të zgjasë deri në qershorin e vitit të ardhshme.
Ajo që parashikohet është që çmimet do të relaksohen por nuk do të bien deri aty k u ishin. Për ne është katërfishuar çmimi”, tha Rama.
Rikujtojmë se në një deklaratë të papritur për mediat, kryeministri Edi Rama i është drejtuar qytetarëve shqiptarë me një mesazh duke paralajmëruar se bota aktualisht po vuan një krizë të jashtëzakonshme energjetike dhe se pasojat po fillojnë të ndihen edhe në Shqipëri. Kjo krizë energjetike tha Rama po ndikon drejtpërdrejtë në rritjen e çmimin e karburanteve, ku çmimet do të jenë marramendëse dhe ndikimin më të madh do e ketë në jetën e familjarëve dhe bizneseve.
