Deputetja e Partisë Demokratike dhe kryetare e Komisionit të Medias dhe të Drejtave të Njeriut, Jorida Tabaku, ka mbajtur një fjalë në sallën e Dhomës së Lordëve në Mbretërinë e Bashkuar, në një konferencë të organizuar nga Westminster Foundation for Democracy, ku morën pjesë parlamentarë nga vendet e Ballkanit Perëndimor dhe përfaqësues të institucioneve britanike e europiane.
Në fjalën e saj, deputetja Tabaku foli hapur për krizën strukturore që po përjeton ekonomia shqiptare, e cila, sipas saj, “nuk vuan vetëm nga mungesa e rritjes së qëndrueshme, por nga një sistem që është kapur dhe kontrollohet prej interesave të ngushta që pengojnë konkurrencën e ndershme dhe besimin publik”.
“Në shumë prej vendeve tona, përfshirë Shqipërinë, ekonomia nuk është as e lirë dhe as e drejtë. Ajo është bërë sistematikisht përjashtuese. Rritja është reale vetëm në letër, por jo në jetën e qytetarëve. Kapitali lëviz shpejt, por besimi lëviz ngadalë,” – theksoi Tabaku në fjalën e saj.
Sipas deputetes demokrate, problemi më i madh nuk qëndron te mungesa e ligjeve, por te mungesa e zbatimit të tyre dhe përdorimi politik i ekonomisë.
“Shqipëria sot vuan nga një ekonomi që shpesh funksionon si zgjatim i pushtetit. Një ekonomi ku rregullat nuk zbatohen njësoj për të gjithë, ku meritokracia është zëvendësuar nga lidhjet, dhe ku transparenca është vetëm premtim, jo praktikë,” – u shpreh ajo.
Tabaku theksoi se pastrimi i parave dhe qarkullimi i kapitalit të dyshimtë në sektorë kyç, si ndërtimi dhe pasuritë e paluajtshme, po minojnë konkurrencën, po deformojnë tregun dhe po gërryejnë besimin tek shteti.
“Kur ekonomia operon me 30 apo 40 për qind informalitet, kur raportet ndërkombëtare flasin hapur për qarkullim parash të pista në sektorin e ndërtimit dhe pasurive të paluajtshme, atëherë demokracia është e rrezikuar shumë përpara se të hidhet vota e parë. Sepse në një sistem të tillë, zgjedhjet mund të jenë të lira, por nuk janë më të ndershme,” – paralajmëroi Tabaku.
Duke iu referuar përvojës së saj si një nga zërat më të angazhuar për reformën ekonomike dhe integrimin europian, ajo solli shembullin e ligjit për kontrollin e investimeve të huaja direkte (FDI Screening Law), që ka propozuar në Kuvendin e Shqipërisë.
“Nuk e kam propozuar këtë ligj për të penguar investimet, por për t’i mbrojtur ato. Për të mbrojtur tregun shqiptar nga kapitalet e dyshimta, për ta përputhur me standardet europiane dhe për të garantuar se Shqipëria është e hapur ndaj botës, por jo e pambrojtur ndaj abuzimeve,” – nënvizoi deputetja e PD-së.
Tabaku theksoi se korrupsioni në rajon nuk është më aksidental, por një mjet i qëllimshëm për të kapur institucionet, shtypur konkurrencën dhe për të kontrolluar tregun.
“Korrupsioni nuk është më pasojë, por metodë. Ai është bërë një sistem që nxit varësinë ekonomike dhe shkatërron nismën private. Ai është mjeti me të cilin mbahet në këmbë një ekonomi e kapur,” – u shpreh ajo me tone të forta.
Në vijim të fjalës së saj, Tabaku theksoi se sfida më e madhe për rajonin dhe për Shqipërinë është rikthimi i besimit tek ekonomia dhe tek politika.
“Ka një lodhje të thellë në mesin e qytetarëve tanë. Ata dëgjojnë çdo ditë për GDP, për investime dhe për rritje ekonomike, por ajo që ndjejnë është rritja e kostos së jetesës, stanjacioni i pagave dhe mungesa e shpresës. Nëse nuk e adresojmë këtë ndjesi jo vetëm me shifra, por me drejtim dhe me vullnet politik, rrezikojmë të humbasim më shumë se fonde — rrezikojmë të humbasim besimin publik,” – theksoi ajo.
Në fund të fjalës, deputetja e PD-së theksoi se rritja e qëndrueshme nuk është vetëm çështje ekonomike, por edhe morale:
“Rritja nuk mund të matet vetëm me shifra, por me drejtësi. Rritja nuk është e vërtetë — derisa të jetë e drejtë. Lufta për një ekonomi të pastër është lufta për një demokraci të pastër.”
Discussion about this post