Rrjedhje gazi në një karburant në Shkozë, evakuohen banorët

Ka patur një rrjedhje gazi në një karburant pranë rrethrrotullimit të Shkozës.

Sipas burimeve, Policia ka bërë rrethimin e zonës për arsye sigurie.

Forcat zjarrfikëse janë në vendngjarje dhe po punojnë për riparimin e një tubi në pikën e karburantit. Situata është nën kontroll.

Janë evakuuar edhe disa banorë të banesave që ndodhen pranë pikës së karburantit.

Kanë qenë vetë banorët që kanë njoftuar zjarrfikësit dhe Policinë për erën e rëndë të gazit.

Njoftimi i Policisë:

Më datë 30.09.2023, rreth orës 11:35, në rrugën “Sadik Petrela”, në një karburant, është çarë një tub gazi i karburantit.

Në vendngjarje ndodhen shërbimet e Policisë, të ambulancës dhe të zjarrfikëses, dhe teknikët të cilët po punojnë për rregullimin e defektit.

Shërbimet e Policisë kanë evakuuar banorët dhe për çështje sigurie është bllokuar përkohësisht rruga e urës së Shkozës dhe perimetri që ka rrezikshmëri.

Grupi hetimor ndodhet në vendngjarje dhe po punon për zbardhjen e rrethanave të ngjarjes.