“Rrjeti”, Apeli lë në burg 35 të arrestuar/ Roli i agjentit “K”

në Aktualitet

Kohë leximi: 2 min

Gjykata e Apelit ka lënë në fuqi masat e sigurisë për 45 personat e arrestuar në kuadër të operacionit të koduar “Rrjeta”, ku sipas të dhënave zyrtare u goditën 4 grupe kriminale që shpërndanin drogë në qytete të ndryshme.

Apeli vendosi që 35 prej të arrestuarve do të qëndrojnë në burg, 3 të tjerë do të qëndrojnë në “arrest shtëpie”, ndërsa 7 të tjerë janë lënë në detyrim paraqitjeje.

Në operacionin ‘Rrjeti’ janë sekuestruar 51 milionë lekë, 15 mijë euro si dhe një shumë frangash zviceriane. Gjithashtu shtë sekuestruar 1 kilogram e 311 gramë kokainë, 860 gramë heroinë, 1 kilogram e 317 gramë kanabis, mijëra doza kokaine, heroine, kanabisi dhe metadoni, fara kanabisi, një armë zjarri model 56, sasi municoni luftarak, pjesë të armëve të zjarrit, silenciatorë, armë të ftohta.

Sipas Report Tv, veprimtaria e grupeve kriminale u zbulua nga agjenti i infiltruar me simbolin ‘K’, i cili luajti rolin e një blerësi droge dhe zbuloi se si realizohej shitja e lëndëve narkotike. Ata shpërndanin lëndë narkotike të llojit kokainë, heroinë, ekstazi dhe kanabis që e përpunonin dhe e përgatisnin në doza të vogla, gati për shitje.

Lënda narkotike shitej në forma të ndryshme, dikush me letra si të paketave të cigares, një tjetër në shishe uji, apo edhe në materiale plastike.