Rreth 400 milionë lekë ka marrë kreu i bashkisë Himarë, Jorgo Goro, nga xhepi i qytetarëve dhe i ka xhiruar në arkën e kompanisë Salillari Sh.p.k.. Më 30 shtator, kjo bashki ka mbyllur tenderin për projektin “Rikonstruksioni i rrugës Stefanel segmenti”, të cilin ja ka falur pa garë Salillarit.Zakonisht, punët që merr përsipër Salillari i bën shkel e shko, pasi më shumë i arnon se i rindërton rrugët, si pasojë ka ndodhur që pas ca muajsh të amortizohen sërish. Por, për Gorën nuk kanë rëndësi këto detaje, për aq kohë sa paratë vilen nga taksapaguesit shqiptarë.
Tenderi me numër reference REF-38974-08-16-2022 ka pasur si afat të fundit për dorëzimin e ofertave datën 20 shtator, por përveç Salillarit nuk është paraqitur asnjë ofertë tjetër. Jorgo duhej të pezullonte procesin e tenderit, të rishikonte kriteret dhe të rishpallte sërish garën. Por, ky i fundit e ka shkelur rregullin e konkurrencës duke ia falur këtë tender mikut të tij Pëllumb Salillari. Nisur nga kjo, kompania fituese ka ofruar sa ka dashur, madje ka paraqitur ofertën më të lartë se 95 përqind e fondit limit.
Gjysmë miliardi lekë për gjysmën e rrugës
Tenderi i sipërpërmendur është vetëm për një pjesë të rrugës Stefanel, pra segmentet nga 4 deri në 6. Pasi, pjesa tjetër është bërë një vit më parë, me tender të fituar sërish nga Pëllumb Salillari. Për këtë prokurim Pëllumb Salillari me kompaninë e tij Salillari ka “përlarë” gati gjysmë miliardi nga Bashkia Himarë. Tenderi konsiderohet i dyshimtë për disa aspekte. Por le t’i analizojmë gjërat me radhë. Në mënyrë konkrete bëhet fjalë për procedurën e prokurimit me numër reference REF-06869-09-30-2021 dhe me objekt “Rikonstruksioni i rrugës Stefanel segmenti 2-4”. Fondi limit i kësaj procedure është llogaritur në vlerën prej 37,499,814 lekë të reja pa TVSH. Edhe në këtë rast kemi të bëjmë me konkurrencë të cunguar dhe ofertë shumë të shtrenjtë, por Jorgo Goro ia dha Salillarit.
Fitues i paracaktuar
Faktet e grumbulluara na tregojnë se në këtë rast kemi të bëjmë me fitues të paracaktuar, çka tregon se Bashkia Himarë ka shkelur ligjin me vetëdije të plotë për këtë prokurim. Ky është i njëjti projekt, por që Goro e ka ndarë në dy procedura tenderuese. Në tenderin e parë në 2021, në një garë të rreme shpalli fitues Salillarin. Ndërsa për pjesën e dytë që u mbyll me vetëm pak ditë më parë ia fali pa garë Salillarit. Çka do të thotë se, Pëllumbi e kishte të siguruar fitoren. Ndërsa mbetet në pikëpyetje fakti pse i duhej më shumë se një vit Salillarit që të bëjë riparime në rrugë. Në fakt punimet do të zgjasin në total 2 vjet, pasi tenderi i mbyllur me 30 shtator parashikon që punimet të zgjasin edhe për 10 muaj. Kjo rrugë iu ka kushtuar qytetarëve 2 vjet zvarritje, 1 miliard lekë dhe një tjetër aferë korruptive nga kryebashkiaku Goro.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post