Drejtori i ri i Policisë së Shtetit, Muhamet Rrumbullaku, ka nisur detyrën e re me shpenzime luksi. Me datë 5 dhjetor 2022, drejtori ka firmosur një tender i cili mban vlerën 600 milionë lekë. Ndërsa ka harxhuar pak javë më parë miliona euro për databazën e Policisë së Shtetit, tashmë po merr makina me qira. Fillimisht për këtë tender është lënë në dispozicion fondi prej 46,310,400 lekë. Por, me sa duket kompania fituese “Tirana Auto” sh.p.k ka kërkuar më shumë para për ofrimin e këtij shërbimi.
Kështu, Rrumbullaku duke u justifikuar me faktin se ky tender kërkon shërbimë më të zgjeruara që ndahen në lote, kostoja për këtë pjesë rritet me 100 milionë lekë. Dhe shpenzimi përfundimtar do të jetë 55,572,480 lekë të reja.
2.4 milionë euro në tetor
Ky është tenderi i dytë që zhvillon Policia e Shtetit në pak javë për makina me qira. Pasi me datë 24 tetor 2022, Rrumbullaku ka firmosur një tjetër tender për të njëjtin objekt “makina me qira për Policinë e Shtetit. Bëhet fjalë për tenderin me numër reference “REF-46056-10-14-2022” dhe qëllim “Marrje me qira operacionale të autovetuarave në shërbim të Policisë së Shtetit” .
“Afati i shërbimit do të jetë: 48(dyzet e tetë) muaj nga momenti i dorëzimit të mjeteve. Lëvrimi i mjeteve duhet të bëhet brenda 150 ditëve nga data e lidhjes së kontratës”, thuhet në dokument. Por, pa filluar akoma marrja e këtyre makinave, Rrumbullaku porositi të tjerat. Dy tenderë me vlera të larta në pak javë lënë për të dyshuar! Shtojmë edhe këtu faktin se Policia e Shtetit është e kompletuar me makina, për gjithë sektorët, shërbimet, makina të personalizuara zyrtare për të gjithë drejtuesit, shefat e madje dhe për sekretaret e tyre.
Loja që nisi nga Nano
Në fakt loja e makinave me qira nisi që në kohën kur Policia e Shtetit drejtohej nga Gledis Nano. Pasi edhe ky i fundit ka bërë një tender për marrje makinash me qira për 4 vite e vlerë 5.2 milionë Euro. Ndërkohë që 5 tenderë të tjerë me afat 4 vite e me vlera nga 3 milionë Euro janë në zbatim.
Këto fakte, për marrje makinash me qira, kur policia ka makina me bollëk. Të cilat kanë kushtuar shumë ose janë dhuruar nga strukturat partnere ndërkombëtare. Po krijohen dyshime, se edhe drejtori Muhamet Rrumbullaku e ka firmosur këtë lloj tenderi me qëllime abuzimi me fondin.
Madje, vlen të kujtojmë se tenderi i makinave me qira, që merr policia qysh prej vitit 2017 kur ministër ishte Fatmir Xhafaj dhe drejtor Ardi Veliu. Po vazhdon si “traditë’ në çdo 6 muaj dhe 1 vit. Nëse hapen letrat, do të rezultojë se është aferë më e madhe se vjedhja 10 milionë Eurove në tenderin e uniformave të policisë, që firmosi Ardi Veliu.
Esmeralda Hida
Lexo edhe: Shkarkimi i Gledis Nanos nga Policia e Shtetit, zbulohet kush që do e zëvendësojë (EMRI)
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post