Kryetari i Këshillit Drejtues të RTSH, Leka Bungo, propozoi në Komisionin e Medias që ky institucion të mbyllet për 6 muaj dhe të ngrihen komisione që të bëhen audicione serioze.
“E fundit është shumë e trishtë, por duhet ta them, mendoj që RTSH duhet të mbyllet 6 muaj. Dhe të gjithë punonjësit të largohen me ligj, dhe të rikthehen ata që duhet të rikthehen, dhe të mos rikthehen ata që nuk duhen. Kjo gjë ka precedentë, ka ndodhur në Greqi para tre vitesh. Kam takuar njerëz atje dhe më kanë sqaruar mekanizmin. Edhe Spanja e ka bërë para 7 vjetësh”, u shpreh Bungo.
Bungo kërkoi ndër të tjera, audicione profesionale dhe ndërmarrjen e një operacioni të domosdoshëm.
“Te ne është e domosdoshme. Në këtë periudhe 6 mujore, të ngrihen Komisione serioze profesionale për gazetari, krijmtari, kanto, që të bëhen audicione serioze profesionale. Aktualisht kemi 1150 punonjës, nga të cilët 300 i keni në kafe tani, minimumi po them. Sa që shpesh kam unë turp kur i shoh, se ata nuk para turpërohen. Një operacion i tillë është shumë i vështirë, i dhimbshëm, por i domosdoshëm, që të mos bëjmë sikur bëjmë reforma. Nëse doni si Komision të hyni në histori për një revolucion të vërtet në media, është ky. Ata njerëz do ikin 6 muaj, por do paguhen. Aman e dimë që pas 6 muajsh e dimë që do kemi një RTSH që do bëjë atë që duhet të bëjë”, tha ai.
Më herët, deputetja e PD, Ina Zhupa është shprehur kundër rritjes së buxhetit për RTSH-në, pasi sjell rritjen e tarifave për qytetarët.
Discussion about this post