Rusia e pamëshirshme/ Ministri i Shëndetësisë në Ukrainë: Kanë goditur spitalet

Ministri i Shëndetësisë Viktor Lyashko ka bërë me dije pasditen e sotme se forcat ruse kanë goditur edhe spitalet.

 “Kjo është një shkelje e drejtpërdrejtë e Konventës së Gjenevës nga trupat ruse! Spitalet tona dhe ekipet e urgjencës mjekësore janë në gatishmëri të plotë, duke punuar në të gjitha rajonet dhe do të ofrojnë kujdes në të gjitha rrethanat”, shtoi ai.

Vladimir Putin e urdhëroi në orën 5:55 të mëngjesit me orën e Moskës nisjen e mësymjes në Ukrainë, dhe granatat e raketat e para u lëshuan vetëm disa minuta më vonë. Sirenat e emergjencës gjëmuan në kryeqytetin ukrainas, Kiev.

Të tmerruar, njerëzit kanë nxituar të largohen prej andej. Një numër i madh makinash janë parë nëpër rrugë, teksa paniku i ka përfshirë banorët e Kievit.

Ata që nuk janë larguar, iu drejtuan me nxitim bodrumeve, ndërsa stacionet e metrosë së Kievit gjithashtu raportohet se po kthehen në bunkerë të improvizuar.

Dëshmitarë okularë i kanë raportuar CNN se stacionet e metrove janë mbushur me njerëz, që kanë marrë sasi të mëdha ushqimi me vete.