Rusia ka vendosur të pezullojë pjesëmarrjen në marrëveshjen që parashikon eksportin e produkteve nga portet e Ukrainës. Informacionin e ka dhënë agjencia ruse e lajmeve TASS. Në njoftim citohet Ministria e Mbrojtjes e cila ka deklaruar se ky vendim vjen pas sulmeve në flotën e saj në Krime.
Pak minuta më parë, e njëjta agjenci transmetoi deklaratat e ministrit të Bujqësisë Dmitry Patrushev, i cili thuhet se tha se Rusia është e gatshme të furnizojë 500,000 tonë drithë për vendet e varfra në katër muajt e ardhshëm, me ndihmën e Turqisë.
Moska pretendon se vetëm 3% e eksporteve të ushqimeve nga Ukraina kanë shkuar në vendet e varfra, ndërsa gjysma e dërgesave ishin të destinuara për vendet perëndimore.
Iniciativa për drithërat e Detit të Zi u nënshkrua më 22 korrik në Turqi dhe që atëherë disa milionë tonë grurë, misër, vaj luledielli, tërshërë, kanola dhe sojë janë eksportuar nga Ukraina.
Kujtojmë se deri në momentin që u firmos marrëveshja, shumë vende në botë ishin në një krizë “buke” pasi Rusia dhe Ukraina janë eksportuesit më të mëdhenj të grurit në botë.
Discussion about this post