Shtetet e Bashkuara të Amerikës kanë paralajmëruar aleatët europianë se Rusia po planifikon të pushtojë Ukrainën, shkruan Bloomberg. Sipas agjencisë amerikane të lajmeve, duke cituar disa ekspertë, zyrtarët amerikanë informuan homologët e tyre të Bashkimit Europian rreth shqetësimeve që kishin.
Raporti shton gjithashtu se vlerësimet e SHBA-së bazohen në informacione që nuk u janë komunikuar ende qeverive europiane, gjë që duhet të ndodhë përpara se të merret ndonjë vendim për një “përgjigje kolektive”.
Të mërkurën, Sekretari amerikan i Shtetit, Anthony Blinken tha se Shtetet e Bashkuara “po monitorojnë rajonin nga afër” dhe “do të vazhdojnë të konsultohen me aleatët dhe partnerët e tyre për këtë çështje”.
Nga ana e saj, Rusia theksoi se rritja e forcave ushtarake brenda territorit të saj është një çështje e brendshme, duke mohuar se ka një qëndrim agresiv ndaj Ukrainës. Në të njëjtën kohë, Moska akuzon Uashingtonin për veprime provokuese të luftanijeve të saj në Detin e Zi, pranë territorit rus.
Në të njëjtën kohë, sipas burimeve të Kremlinit, Rusia nuk ka ndërmend të nisë një luftë në Ukrainë, pavarësisht se Moska është e gatshme të përdorë forcën nëse do të jetë e nevojshme. Rikujtojmë se tension i ngjashëm ka ndodhur edhe gjatë muajit prill kur 100 mijë ushtarë së bashku me forca të blinduara dhe avionë luftarakë u pozicionuan pranë kufirit ruso-ukrainas.
Discussion about this post