Ministria ruse e Mbrojtjes njoftoi këtë të enjte avancimin e trupave të saj në lindje të Ukrainës. Sipas raportimeve të agjencisë shtetërore TASS, Rusia ka marrë kontrollin e dy fshatrave: Muravka në rajonin e Donetskut dhe Novoivanivka në zonën e Zaporizhias.
Ndërkohë, Presidenti i Ukrainës, Volodymyr Zelensky, bëri thirrje për presion më të madh ndërkombëtar ndaj Moskës, në mënyrë që t’i jepet fund luftimeve.
“Duhet veprim vendimtar. Presioni i fortë funksionon,” shkroi Zelensky në rrjetin social X, duke falënderuar Australinë për uljen e çmimit maksimal të naftës ruse.
“Tani presim me padurim një paketë të fortë të 19-të të sanksioneve të BE-së dhe hapa vendimtarë nga Shtetet e Bashkuara. Rusia do ta ndalë luftën vetëm nëse presioni kundër saj është mjaftueshëm i dhimbshëm,” shtoi ai.
Kujtojmë se një ditë më parë, Presidenti i SHBA-së, Donald Trump, deklaroi se ishte i zhgënjyer me Vladimir Putinin dhe bëri thirrje ndaj vendeve anëtare të NATO-s që të ndalojnë blerjen e naftës ruse, duke theksuar se kjo do të ndihmonte në përfundimin e konfliktit në Ukrainë.
Discussion about this post