Vehap Kola – Një studim i fundit i Qendrës për Kërkime në Administrimin Publik (KDZ) me seli në Vienë, tregon se qeverisja shqiptarëve u kushton shumë pak. Sipas të dhënave të përftuara nga EUROSTAT, në vitin 2021, 27 vendet e BE-së shpenzuan mesatarisht 7,122 njësi sipas standardit të fuqisë blerëse (PPS), ndërsa qeveria shqiptare shpenzoi 6 herë më pak, ose 1.213 njësi të standardit të fuqisë blerëse. Standarti i fuqisë blerëse (PPS) është njësi matëse artificiale, një njësi e së cilës mund të blejë të njëjtën sasi mallrash dhe shërbimesh në çdo vend.
Indikatori Botëror i Qeverisjes (WGI) i Bankës Botërore, mat status quo-në e qeverisjes në pothuajse në të gjitha vendet e botës. Praktikisht, ai jep një pamje të:
- Cilësisë së shërbimeve publike
- Cilësisë së shërbimit civil
- Shkallës së pavarësisë së tij nga presionet politike
- Cilësinë e formulimit të politikave dhe zbatimit të tyre
- Dhe besueshmërinë e angazhimit të qeverisë për politika të tilla
Vlerat e indikatorit variojnë nga –2.5 (dobët) deri në 2.5 (i qëndrueshëm).
Grafiku i mëposhtëm tregon një raport përgjithësisht të drejtë ndërmjet efiçencës së qeverisjes dhe shpenzimeve të qeverive për qytetarët. Në rajonin e Ballkanit Perëndimor, raporti më i varfër ndërmjet efiçencës dhe vëllimit të shpenzimeve është Bosnja dhe Hercegovina.
Por ajo që bie në sy është se efiçenca e qeverisjes shqiptare në vitin 2021 është negative, –0.14. Megjithëse Shqipëria zbaton prej pothuajse një dekade taksimin progresiv, barrë të lartë fiskale dhe qeveriset prej një partie të majtë, shkalla e efiçencës së kësaj qeverisjeje është ndër më të ulëtat në Europë. E shprehur me standardin e fuqisë blerëse, qeveria e Shqipërisë harxhon më pak se çdo qeveri tjetër e Europës për frymë qytetari në vit.
Në përgjithësi rajoni i Europës Juglindore shpenzon më pak për qytetarët dhe administrata publike ka efiçencë më të dobët në përdorimin e parave të buxhetit. Reformat e administratës publike në vende si Shqipëria duket se kanë qenë gjithnjë sipërfaqësore dhe aspak përmbajtësore. Kapaciteti qeverisës i administratës mbetet i dobët dhe i ndikuar fort nga patronati politik i partisë në pushtet.
Si një monopol në administrimin e burimeve natyrore dhe paratë e taksave, admnistrata publike shqiptare është një e dhënë më shumë se monopolizimi i tregut ul efiçencën dhe përfitimet për konsumatorët. Të fituarit e vetëm të monopolit shtetëror të buxhetit, liçencave dhe burimeve natyrore janë klientët e qeverisë.
Discussion about this post