Eksportet e produkteve bujqësore “Made in Albania” janë rritur me 23 % përgjatë muajit Qershor 2024 në raport me të njëjtën periudhë të një viti më parë, muaj i cili kulmon edhe prodhimin sezonal.
Referuar të dhënave zyrtare nga Ministria e Bujqësisë, përgjatë muajit Qershor janë eksportuar në total 60.531 ton produkte, nga 49.397 ton, me një kapërcim prej 11.134 ton.
Shifrat edhe pse mujore, tregojnë një prezencë në rritje të produkteve shqiptare në tregjet ndërkombëtare, dhe po ashtu kërkesë në rritje nga konsumatorët e huaj.
Ndërsa rritja në sasi e fruta-perimeve që janë treguar jashtë kufijve regjistrohet në nivelin 31% krahasuar me qershorin e vitit 2023. Konkretisht vetëm gjatë Qershorit në shtetet europiane dhe jo vetëm, janë tregtuar 47 mijë ton fruta-perime nga 35.845 ton që u eksportuan në Qershor 2023.
Viti 2023 u mbyll me një shifër totale eksportesh në vlerën e 55.7 miliard lekëve, duke shënuar një rritje me 7.7% gjatë vitit 2023, krahasuar me vitin 2022.
Objektivi i qeverisë është që përmes politikave mbështetëse për fermerët në drejtim të prodhimit, cilësisë dhe certifikimit, të arrihet në nivelin e 1 miliardë dollarë eksporte deri në vitin 2030.
Discussion about this post