Dhoma Amerikane e Tregtisë ka komentuar dënimin me 3.4 vite burg të ish-ministrit të Brendshëm, Saimir Tahiri. Në një deklaratë, presidenti Enio Jaço shkruan se ky vendim ka ndezur sinjalin e parë se Drejtësia në Shqipëri po nis të zgjohet.
Sipas tij, ky akt kërkon një guxim të madh, ndërsa ç’rrënjos kulturën primitive se dhe funksionarët më të lartë në qeveri mund të ndëshkohen.
“Pavarësisht masës së dënimit që kërkon guxim dhe “stomak të fortë” ligjor e profesional, fakti se zyrtarë apo ish-zyrtarë në nivelet më të larta të qeverisë mund të ndëshkohen po ç’rrënjos kulturën primitive, që përbën thelbin e problemeve në Shqipëri. Një fenomen i ngritur me shqetësim nga Dhoma Amerikane për padrejtësitë që prej vitesh vuajnë bizneset e ndershme në dyert e gjykatave, e që gjithashtu mban larg investitorët e huaj”, shkruhet në deklaratë.
Ndër të tjera, ai shton se vendimi për ish ministrin s’do të thotë se Drejtësia sot është “perfekte”, por mund të jetë një fillim i gjatë në kohë duke bërë që sot disa njerëz të ndershëm të ndihen më mirë.
Discussion about this post