Emiriana Sako shfrenohet bë shpenzime për bredha dhe drita vezulluese për fundvitin. 100 milionë lekë do të harxhojë Bashkia Durrës vetëm për dekoret e Krishtlindjeve dhe Vitit të Ri. Ditën e sotme, Bashkia Durrës ka mbyllur garën për projektin me objekt “Blerje Dekori, viti 2022”, për të cilin është lënë në dispozicion shuma prej 9 780 000,00 mijë lekë. Këto janë lekë të vjelë nga taksat e durrsakëve, të cilët prej tre vitesh festat i gjejnë në çadra apo hyrje me qira, për shkak të tërmetit që i la pa shtëpi. Sako dhe Rama nuk kanë ndërmend ta përfundojë ndërtimin e shtëpive të prekura nga tërmeti, por i çojnë paratë për zbukurime të kushtueshme!
Duke shkelur premtimet për të pastrehët.
Sako po harxhon afro 100 milionë lekë për të dekoruar bashkinë dhe për të vendosur pemën e Vitit të Ri tek sheshi para zyrës së vet. Në dokumentet që shoqërojnë tenderin evidentohet se do të blihen drita për veshjen e fasadës së Bashkisë. Madje specifikohet që të jenë drita me efekt special dhe që të mbulojnë të tërë godinën.
“E gjithë linja e dritave të montohet sipër një zgare alumini. E cila do të jetë e kapur në fasadën e jashtme të Bashkisë pa e dëmtuar atë. Dritat do të jenë LED i ngrohtë dhe 100% flash. Vargjet e dritave të jenë të vendosura jo më shume se 10cm larg nga njëra tjetra. Specifika e dritave: 100LEDS/10M/SE，lidhje seri me këllef dhe silikon në çdo llampe,IP44, kabulli+3A CONVERTOR+IP44. Standarte për BE për përdorim të jashtëm. Specifika e Aluminit : Profil20x20 , i kapur në fasada pa dëmtuar fasadën e jashtme të godinës . Sipërfaqja që do të vishet me drita”, thuhet në dokument.
Ndërsa një pjesë e mirë e fondit do të shkojnë për pemën dhe zbukurimet e saj, edhe pse do të merret me qira. Por Sako nuk mjaftohet me kaq! Ajo kërkon edhe një pemë tjetër që të shkëlqejë pranë sheshit tek busti i Azem Hajdarit. Ndërsa paratë e tjera do të shkojnë për zbukurimet në rrugët e qytetit. Në rastin e festave askush nuk do ishte kundër për zbukurime dhe krijim atmosfere të këndshme. Por kaq shumë shpenzime, lënë vend për dyshime dhe diskutim.
Fituese pa garë, mikja e Sakos
Më tutje në dokument rezulton se ky tender është dhënë pa garë. Për këtë projekt ka regjistruar ofertën e saj vetëm kompania Iceberg Communication, e cila më parë quhej Iceberg Publicity, në pronësi të Rafaela Ricës. Kryebashkiakja Sako nuk ka vonuar shumë dhe pa konkurrencë fare ia ka xhiruar lekët Ricës. Kështu, Open Data Albania e ka listuar te tenderat me “Red Flag” për shkak të riskut të lartë të shpërdorimit të fondeve.
Në fakt ky tender ishte me fitues të paracaktuar dhe këtë e tregojnë të dhënat e mëposhtme. Kompania e Rafaelës ka krijuar një lidhje klienteliste me Bashkinë e Durrësit, një nga njësitë vendore më të korruptuara në Shqipëri. Ajo i merr çdo vit tenderët për zbukurimin e Durrësit për festat e fundvitit.
Në 9 nëntor 2021, Rica mori pa garë tenderin për blerje dekori me vlerë 81 milionë lekë, gati sa fundi limit. Vetë tenderi ka qenë një dekor për Ricën. E cila, më pas shfaqet nëpër udhëtime luksoze, vende ekzotike si dhe ekspozohet në dreka dhe darka, pa munguar edhe në festa speciale. Ndërsa këtë vit, Sako ka shtuar edhe 16 milionë lekë të tjera për kompaninë e saj. Me sa duket dekoret qenkan shtrenjtuar.
Ndërsa në vitin 2020, Rafaela Rica ka marrë edhe një tender tjetër tek Emirjana Sako. Këtë herë me vlerë mbi 100 milionë lekë, duke qenë e vetme në garë. Epo duket qartë lidhja që kanë Sako dhe Rica me njëra-tjetrën! I tërheq paraja publike, me të cilat zbukurojnë dhe pasurojnë veten.
Lexo edhe: Sako i jep 70 mln lekë pa garë Nursenit, mikut të Blendi Gonxhes
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post