Përmes një interviste televizive ish-kryedemokrati Sali Berisha tha se pas 11 dhjetorit PD do të ngrihet për të shkuar në nivelin që ka qenë dikur, duke theksuar se ai do të jetë i vetmi Kuvend legjitim që do të sjellë ndryshimin.
“Kuvendi i 11 dhjetorit do të jetë ringritja e Partisë Demokratike. Ky Kuvend do të demokratizojë si kurrë më parë këtë parti dhe do të vendosë rregulla. Ne nuk do të përjashtojmë askënd nga Partia Demokratike, ndaj edhe iu bëjmë thirrje çdo delegati dhe çdo deputeti të vijë në Kuvendin e 11 dhjetorit”, tha ish-kryeministri.
Ndër të tjera ai u shpreh se, vendimi i Lulzim Bashës ishte i padrejtë, ndërsa u shpreh se ai humbi 4 palë zgjedhje dhe nuk dha dorëheqjen. Sakaq, ai theksoi se selia e PD është pronë e Partisë Demokratike dhe jo e Lulzim Bashës. “Basha mund të bëjë çfarë të dojë, mund të shkojë në Gjykatë, por selia e PD është pronë e Partisë Demokratike. Më 11 dhjetor ne rithemelojmë PD, do të ngremë një komision që do të përfundojë punën e rithemelimit të partisë. Më 18 dhjetor nuk ka Kuvend, pasi Kryesia e PD që mori vendimin ka 21 anëtarë jo-legjitimë, pasi nuk janë votuar sikundër e kërkon statuti”, tha Berisha. Ai u shpreh se delegatët e Kuvendit po ia refuzojnë formularët Lulzim Bashës.
Discussion about this post