Ish-deputeti i Partisë Demokratike, Ervin Salianji, ka reaguar sërish ndaj Sali Berishës lidhur me procesin zgjedhor për kreun e PD-së, ku Berisha garon i vetëm pasi kandidaturat e tjera, mes tyre edhe ajo e Salianjit, nuk u pranuan.
Përmes një postimi në rrjetet sociale, Salianji ka hedhur akuza të forta ndaj kreut të demokratëve, duke e cilësuar simbol të “votimit pa garë” dhe duke pretenduar se pjesëmarrja në proces ka qenë minimale.
Ai gjithashtu akuzon Berishën për manipulim të votimit dhe për kthimin e Partisë Demokratike në një “parti private”, ndërsa flet edhe për një aleancë të hapur me kryeministrin Edi Rama.
“Përgjigje për Sali kolltukun; për njeriun më e dhimbshme se humbja është poshtërimi, qesharakëzimi dhe përbuzja përmes talljes.
Sot je kthyer në simbolin e votimit pa garë, uzurpatorit pa zgjedhje dhe pa dinjitet politik, vrasesin e shpreses se qytetarëve për ndryshim!
Deri tani, në të gjithë Shqipërinë nuk kanë marrë pjesë as 1000 anëtarë. Do t’i faktoj me prova reale sa ka qenë pjesëmarrja dhe si po përgatitesh ta manipulosh atë me shifra false.
Meqë e ke me qejf; Je i pashpresë. Frika nga gara të çoi në uzurpimin e Partisë Demokratike dhe në aleancë të hapur me Ramën për të forcuar regjimin Rama-Berisha. Demokratët nuk ta pranojnë më modelin e partisë private, ku votohet pa zgjedhje dhe përjashtohet kush mendon ndryshe.
Bashkë me demokratët do ta çmontojmë regjimin Rama-Berisha dhe do të rrëzojmë praktikat puniste të votimit farsë, që poshtërojnë pluralizmin dhe mbajnë peng opozitën shqiptare.
Falenderime pafund per qindra demokrate që me sjellin me foto fletet e votimit dhe mijëra te tjere qe e kane perbuzur farsen duke e bojkotuar!”, shkruan Salianji në reagimin e tij.
Discussion about this post