Po vijojnë përgatitjet për samitin e BE-BP që do të mbahet ditën e nesërme në Tiranë. Mikpritja nga ana e kryeministrit Edi Rama do të bëhet në ambientet e “Air Albania”.
Ditën e sotme pritet të mbërrijnë të parët liderët e Ballkanit Perëndimor teksa nesër liderët europianë. Janë marr masa të shumta sigurie për shkak të samitit, ku sic është raportuar edhe më herët janë rreth 1500 policë në gatishmëri.
Ndërkohë zbatimi i masave do të nisë që sot. Për garantimin e sigurisë së personaliteteve të larta europiane pjesëmarrëse në të, perimetri i sigurisë do të përfshijë Stadiumin “Air Albania”, Pallatin e Kongreseve dhe godinën e kryeministrisë dhe gjithë zonën përreth.
Sipas planit të masave në këtë zonë do të ndalohet tërësisht lëvizja e automjeteve, si edhe e qytetarëve që nuk janë rezidentë, përveç të punësuarve. Referuar masave, e bllokuar do të jetë rruga e Elbasanit nga kryqëzimi i “7 xhuxhave” në rrethrrotullimin e Saukut, segmenti i Unazës së Vogël në të dyja krahët nga “7 xhuxhat” deri te kryqëzimi pranë parkut “Rinia”, si edhe bulevardi “Dëshmorët e Kombit” nga ura e Lanës, deri tek ish-Garda e Republikës.
E bllokuar do të jetë edhe rruga nga ura e këmbësorëve mbi Lanë pranë Katedrales Katolike, deri te stadiumi “Air Albania” dhe çdo aks që lidh këtë rrugë me rrugën e Elbasanit dhe bulevardin “Dëshmorët e Kombit”.
Për të krijuar një korridor sigurie për shoqërimin e delegacioneve nga Rinasit në Samit, do të jetë tërësisht i bllokuar aksi nga rrethrrotullimi i Saukut – Unaza e Re në drejtim të Pallatit me Shigjeta – ish-sheshi Shqiponja – autostrada Tiranë-Durrës – Kthesa e Kasharit-Rinas.
Discussion about this post