Presidenti Ilir Meta i ka konsideruar si inkurajuese mesazhet e sotme nga samiti në Slloveni mes përfaqësuesve të BE dhe Ballkanit Perëndimor.
Meta ndan të njëjtin mendim me përfaqësuesit e BE kur shkruan se përmbushja e reformave qëndron në themel të integrimit, ndërsa falenderon BE për mbështetjen që vazhdon t’i japë Shqipërisë dhe rajonit.
“Perspektiva evropiane e rajonit jetësohet përmes reformave të besueshme, në themel të cilave qëndrojnë parimet dhe vlerat evropiane të demokracisë, të drejtave themelore dhe sundimit të ligjit. Mirënjohës për mbështetjen politike dhe ndihmën e gjithanshme, që Bashkimi Evropian vazhdon t’i japë Shqipërisë dhe gjithë rajonit tonë, si partner i parë dhe i natyrshëm ekonomik, duke qëndruar plotësisht të linjëzuar në qëllimin e përbashkët strategjik të zgjerimit”, shkruan Meta.
Ndër të tjera, ai vë theksin te Plani Ekonomik i Investimeve ku thotë se duhet shfrytëzuar për të rimëkëmbur ekonominë.
“Plani Ekonomik i Investimeve dhe Agjenda e re për Inovacionin duhen shfrytëzuar maksimalisht për të rimëkëmbur ekonominë dhe frenuar shpopullimin e mëtejshëm dramatik të vendit”, shprehet ai.
Meta nuk lë mbrapa as bashkëpunimin rajonal, ku dekurajon konfliktet mes shteteve bien pasi ndesh me rrugën evropiane.
“Bashkëpunimi rajonal duhet të jetë gjithëpërfshirës dhe të përqendrohet në zbatimin e zotimeve të ndërmarra. Bishtnimi ndaj këtyre zotimeve dhe parcelizimi i rajonit kundër prodhojnë më shumë ndasi dhe konflikte artificiale të padobishme, dhe bien ndesh me rrugën evropiane të vendeve tona”, shprehet Meta.
Pavarësisht të gjithave, ripërsërit rëndësinë që ka nisja e shpejtë e negociatave të anëtarësimit me Shqipërinë dhe Republikën e Maqedonisë së Veriut dhe liberalizimi sa më parë i vizave me Kosovën.
