Presidenti i Serbisë, Aleksandër Vuçiç ka deklaruar se në Samitin që do të mbahet në Brdo të Sllovenisë do të takojë kancelaren gjermane në largim, Angela Merkel dhe presidentin e Francës, Emmanuel Macron.
Mediat serbe shkruajnë se Vuçiç ka deklaruar se Macron e Merkel me siguri do të lënë ndonjë porosi për të dhe kryeministrin e Kosovës, Albin Kurti.
“Nuk kam iluzione për një hyrje të shpejtë në BE, por është e rëndësishme që Serbia të jetë në rrugën evropiane dhe të ketë bashkëpunim të ngushtë me BE-në, sepse më shumë se 60 përqind e eksporteve shkojnë në BE, dhe Serbia i përket Evropës. Pres një mesazh pozitiv të BE për Ballkanin Perëndimor. Besoj se Macron dhe Merkel, mua dhe Albin Kurtin do të na porosisin për diçka, do të interesohem për energjinë,”- ka thënë Vuçiç.
Vuçiç thotë se Serbia nuk ishte dakord me dy përfaqësuesit shqiptarë në Samitin e PPE.
“Ne nuk u pajtuam për asgjë me të dy përfaqësuesit shqiptarë”, tha ai duke shtuar se nuk ishte i kënaqur me atë që kishte dëgjuar nga përfaqësuesit boshnjakë. “Dallimet midis tre popujve kurrë nuk kanë qenë më të theksuara”, tha ai.
Në samitin e sotëm në Slloveni është i pranishëm dhe kryeministri Edi Rama dhe liderët e tjerë të Ballkanit Perëndimor. Më herët, presidentja e Komisionit Evropian, Ursula von der Leyen u shpreh para gazetarëve se ky është një samit i rëndësishëm me vendet e Ballkanit Perëndimor, duke përsëritur dhe njëherë bindjen e saj se këto vende i takojnë BE.
