Është përcaktuar me short anëtari i ri i Këshillit të Lartë Gjyqësor që do të përfaqësojë Gjykatën e Lartë.
Pas përfundimit të numërimit të votave, dy kandidatët, gjyqtari Sandër Simoni dhe gjyqtarja Arbena Ahmeti, morën të njëjtin numër votash, nga 179 secili.
Në kushtet e barazimit, rregullorja parashikon që fituesi të përcaktohet përmes shortit.
Pas hedhjes së goglave, shorti nxori fitues gjyqtarin Sandër Simoni.
Kështu, Simoni do të jetë anëtari i ri i KLGJ-së nga radhët e Gjykatës së Lartë.
Pas përfundimit të kësaj gare, ka nisur numërimi i votave për kandidatët e dy shkallëve të tjera të gjyqësorit.
Për Gjykatën e Shkallës së Parë, në garën për një vend në KLGJ janë tre kandidate, Manjola Xhaxho, Brunilda Kadi dhe Matilda Llangozi.
Zgjedhja e tre anëtarëve të rinj të Këshillit të Lartë Gjyqësor po zhvillohet gjatë Mbledhjes së Përgjithshme të gjyqtarëve.
Discussion about this post